काठमाडौं । सरकारका प्रवक्ता एवं शिक्षा तथा खेलकुदमन्त्री सस्मित पोखरेलले ‘द ग्रेजोन’ नामक मिडियामा प्रकाशित सामग्रीको आधिकारिकता र विश्वसनीयतामाथि प्रश्न उठाएका छन्।
शुक्रबार मन्त्रिपरिषद् बैठकपछि सञ्चारकर्मीले ‘द ग्रेजोन’ बारे सरकारको आधिकारिक धारणा सोध्दा पोखरेलले सामाजिक सञ्जालमा रहेको फलोअर्सको संख्या मात्र कुनै प्रकाशनको प्रामाणिकताको आधार हुन नसक्ने बताए। सम्बन्धित प्रकाशनको आधिकारिकता र विश्वसनीयता हेर्नुपर्ने उनको भनाइ थियो।
नेपालमा ‘द ग्रेजोन’ को सामग्रीबारे चर्चा भए पनि अमेरिकामै त्यसलाई खासै नचिनिने दाबी गर्दै उनले कुनै अनियमित प्रकाशनले प्रकाशित गरेको सामग्रीमाथि सरकारले टिप्पणी गर्न आवश्यक नरहेको बताए।
उनले भने, ‘त्यसको अथेन्टिसिटी नै नभएको एउटा र्यान्डम म्यागेजिनले प्रकाशन गरेकोमा त्यसमा टीकाटिप्पणी गर्न सरकारको आवश्यकता छैन।’
सञ्चारकर्मीले ‘द ग्रेजोन’लाई कारबाही गर्ने सरकारको अधिकार र क्षमताबारे समेत प्रश्न गरेका थिए। तर पोखरेलले त्यसबारे थप स्पष्ट जवाफ दिएनन्।
‘द ग्रेजोन’को रिपोर्टमा नेपालमा भएको जेन–जी आन्दोलन तथा प्रधानमन्त्री बालेन्द्र साह र राष्ट्रिय स्वतन्त्र पार्टी (रास्वपा) का सभापति रवि लामिछानेसहित केही प्रमुख नेताको राजनीतिक उदयमा अमेरिकी सहयोगमा सञ्चालित संस्थाहरूको भूमिका रहेको दाबी गरिएको छ।
फरक प्रसंगमा, मन्त्री पोखरेलले संविधान दिवस मनाउने तयारी अन्तिम चरणमा पुगेको बताए। संविधान दिवससम्बन्धी कार्यदल गठन गरी त्यसले दिएको प्रतिवेदन र सुझावअनुसार कार्यक्रम कार्यान्वयन भइरहेको उनले जानकारी दिए।
उनका अनुसार संविधान दिवसका अवसरमा शनिबार बिहान काठमाडौंको टुँडिखेलमा कार्यक्रम हुनेछ। त्यसपछि दिउँसो ३ बजे राष्ट्रपति रामचन्द्र पौडेलको उपस्थितिमा राष्ट्रपति कार्यालयमा अर्को कार्यक्रम आयोजना गरिनेछ।
