मकवानपुर । बागमती प्रदेशका मुख्यमन्त्री इन्द्रबहादुर बानियाँले सोमबार दिउँसो १ बजे प्रदेश सभाबाट विश्वासको मत लिने भएका छन्। विश्वासको मत प्रयोजनका लागि बैठक बोलाउन उनले प्रदेश सभा सचिवालयलाई पत्राचार गरेपछि सचिवालयले बैठकसम्बन्धी सूचना जारी गरेको छ।
प्रदेश सभाको दोस्रो कार्यकाल सुरु भएयता ३ वर्ष ९ महिनाको अवधिमा मुख्यमन्त्रीले विश्वासको मत लिन लागेको यो छैटौँ पटक हो। यसअघि विभिन्न समयमा मुख्यमन्त्रीहरूले पाँच पटक विश्वासको मत लिइसकेका छन्।
विसं २०८२ साउन २० गते मुख्यमन्त्री नियुक्त भएका बानियाँले साउन २७ गते नै प्रदेश सभाबाट विश्वासको मत लिएका थिए। नेपाली कांग्रेस र नेकपा एमालेको गठबन्धनमा सरकार गठन गरेका उनी एमालेले समर्थन फिर्ता लिएपछि अल्पमतमा परेका हुन्। त्यससँगै संवैधानिक व्यवस्थाअनुसार उनले पुनः विश्वासको मत लिनुपर्ने अवस्था आएको हो।
कांग्रेस संसदीय दलको बैठकले भदौ ३ गतेअघि विश्वासको मत लिने निर्णय गरेको थियो। तर, राजनीतिक अन्योल लामो समय कायम राख्नुभन्दा छिट्टै शक्ति परीक्षण गरेर सरकारको अवस्था स्पष्ट पार्ने उद्देश्यले मिति अगाडि सारिएको मुख्यमन्त्री तथा मन्त्रिपरिषद् कार्यालयले जनाएको छ।
११० सदस्यीय बागमती प्रदेश सभामा हाल १०४ सदस्य कायम छन्। सरकार जोगाउन मुख्यमन्त्री बानियाँलाई कम्तीमा ५३ सांसदको समर्थन आवश्यक पर्छ। हाल कांग्रेसका ३६ र सरकारमा एक मन्त्रीसहित सहभागी हाम्रो नेपाली पार्टीका दुई गरी ३८ सांसद उनको पक्षमा छन्। सरकारलाई निरन्तरता दिन उनले थप १५ सांसदको समर्थन जुटाउनुपर्ने देखिन्छ।
यता, २६ सिट रहेको नेकपा र २५ सिट भएको एमाले नयाँ सत्ता समीकरण निर्माणको प्रयासमा छन्। दुई दलबीच सहमति भए पनि सरकार गठनका लागि आवश्यक बहुमत भने पुग्दैन। प्रदेश सभाको तेस्रो ठूलो दल राष्ट्रिय प्रजातन्त्र पार्टी (राप्रपा)का १२ सांसदले सरकार गठन प्रक्रियामा सहभागी नहुने निर्णय गरिसकेका छन्। तीन सदस्यीय नेपाल मजदुर किसान पार्टी (नेमकिपा) पनि परम्परागत रूपमा प्रतिपक्षमा बस्ने अडानमा छ।
एमालेले समर्थन फिर्ता लिएपछि बागमती प्रदेशको राजनीतिक गतिविधि तीव्र बनेको छ। सरकारलाई निरन्तरता दिन कांग्रेसले विभिन्न दलसँग संवाद अघि बढाएको छ भने एमाले र नेकपाबीच वैकल्पिक सरकार गठनका विषयमा निरन्तर छलफल भइरहेको छ।
मुख्यमन्त्री बानियाँले प्रदेशमा देखिएको राजनीतिक अन्योल अन्त्य गर्दै स्थिरता कायम गर्न सबै दलसँग सहयोगको अपिल गरेका छन्। उनले एमाले, नेकपा, राप्रपा, नेमकिपा र हाम्रो नेपाली पार्टीलाई सहयोगका लागि पत्राचार गरेको बताएका छन्। हाम्रो नेपाली पार्टीले सकारात्मक जवाफ दिँदै सरकारमा सहभागी भइसकेको र अन्य दलसँग पनि छलफल जारी रहेको उनको भनाइ छ।
बानियाँले संघीयता र गणतन्त्रको रक्षा तथा प्रदेशमा स्थिरता कायम गर्न सबै गणतन्त्र पक्षधर शक्तिले आफूलाई सहयोग गर्ने विश्वास व्यक्त गरेका छन्।
