काठमाडौं। राष्ट्रिय स्वतन्त्र पार्टी (रास्वपा) का सभापति रवि लामिछानेले सरकार गठन भएको चार महिनामा जनअपेक्षाअनुसार कार्यसम्पादनको स्पष्ट छनक देखिनुपर्ने भए पनि त्यसो हुन नसकेको स्वीकार गरेका छन्। सरकारको पूर्ण मूल्यांकन गर्ने समय भइनसकेको भन्दै उनले नागरिकका सुझाव र गुनासोलाई पार्टीले गम्भीरतापूर्वक लिइरहेको बताए।
नेपाली युवा उद्यमी मञ्चको २२औँ वार्षिक साधारणसभामा बोल्दै लामिछानेले चार महिनामै सरकारको अन्तिम मूल्यांकन गर्न नसकिने भए पनि यो अवधिमा केही सकारात्मक परिवर्तनको आभास हुनुपर्ने बताए। “चार महिनामै सरकारको मूल्यांकन गरिहाल्ने समय भइसकेको छैन,” उनले भने, “तर यो अवधिमा केही छनक देखाउन सक्नुपर्थ्यो भन्ने तपाईंहरूको सुझावलाई हामीले मनन गरेका छौँ।”
मुलुकको वर्तमान अवस्थालाई हवाई उडानसँग तुलना गर्दै उनले यात्राका क्रममा कहिलेकाहीँ ‘टर्बुलेन्स’ आउन सक्ने तर गन्तव्य सुरक्षित रहेको दाबी गरे। “चिन्ता नगर्नुहोस्,” उनले भने, “सिट ब्याक एन्ड रिल्याक्स, फास्टेन योर सिट बेल्ट। हामी तपाईंहरूलाई सुरक्षित रूपमा गन्तव्यमा पुर्याउँछौँ।”
लामिछानेले अप्ठ्यारो परिस्थितिलाई सम्हाल्ने राजनीतिक नेतृत्व र जिम्मेवारी रास्वपासँग रहेको दाबी गरे। परिवर्तनका लागि हुटहुटी भएका युवा तथा गैरराजनीतिक पृष्ठभूमिबाट आएका पेशेवरहरू पार्टीमा रहेको उल्लेख गर्दै उनले इतिहासले दिएको अवसरलाई नागरिकसँगको सहकार्यमा देश निर्माणका लागि उपयोग गर्ने बताए। “यो हाम्रो मात्र सरकार होइन, यो तपाईंहरूको सरकार हो,” उनले भने।
