काठमाडौं । पूर्वाधार विकासमन्त्री सुनिल लम्सालले भोटेकोशी विपद्पछिको पुनर्निर्माण तथा पूर्वाधार व्यवस्थापनका लागि करिब १०० अर्ब रुपैयाँ आवश्यक पर्ने बताएका छन् ।
सोमबार सिंहदरबारमा बसेको पूर्वाधार विकास समितिको बैठकमा उनले क्षतिग्रस्त संरचनाको पुनर्निर्माणसँगै भविष्यमा हुने विपद्को जोखिम न्यूनीकरण र पूर्वतयारीका लागि उक्त रकम आवश्यक पर्ने बताए ।
विपद् प्राधिकरणले सडक तथा पुल पुनर्निर्माण, दुई वैकल्पिक मार्ग निर्माण र जोखिम न्यूनीकरणका लागि करिब ९० अर्ब रुपैयाँको प्रारम्भिक आवश्यकता प्रस्तुत गरेको छ । भवन, खानेपानीलगायत पूर्वाधारको क्षति जोड्दा कुल आवश्यकता करिब १०० अर्ब पुग्ने अनुमान गरिएको लम्सालले बताए ।
क्षतिग्रस्त सडक, पुल तथा अन्य संरचनाको तत्काल मर्मत र कनेक्टिभिटी पुनःस्थापनाका लागि सरकारले आपत्कालीन टेन्डरमार्फत काम अघि बढाएको उनले जानकारी दिए । कृष्णभीरलगायत जटिल भूगोल भएका क्षेत्रमा जियोटेक्निकल विज्ञको सुझावअनुसार डिजाइन तयार गरी काम भइरहेको छ ।
‘सरकारले आवश्यक स्रोत व्यवस्थापन गरी काम नरोक्ने नीति लिएको छ,’ उनले भने ।
डीपीआर तयार भइसकेका स्थानमा डिजाइन–एन्ड–बिल्ड मोडलबाट तत्काल टेन्डर गरी पुनर्निर्माणलाई तीव्रता दिने सरकारको तयारी छ । सडक विभागले ब्लास्टिङलगायतका काम पनि समानान्तर रूपमा अघि बढाइरहेको उनले बताए ।
खानेपानीतर्फ तत्काल वैकल्पिक स्रोतबाट वितरण भइरहेको र आगामी सुक्खायामलाई ध्यानमा राख्दै खोलाको पानी शुद्धीकरण गरेर वितरण गर्ने योजना रहेको लम्सालले बताए । पुनर्निर्माणसँगै विपद् जोखिम न्यूनीकरण र पूर्वतयारीलाई पनि प्राथमिकतामा राखेर काम अघि बढाइने उनले जानकारी दिए।
