म्याग्दी । अविरल वर्षासँगै आएको बाढी र पहिरोका कारण म्याग्दी जिल्लामा निर्माणाधीन जलविद्युत् आयोजनाको काम प्रभावित भएको छ । सडक तथा पहुँचमार्ग अवरुद्ध हुँदा निर्माण सामग्री, उपकरण र इन्धन ढुवानी हुन नसकेपछि धवलागिरि र अन्नपूर्ण गाउँपालिकाका विभिन्न आयोजनाको निर्माण प्रभावित भएको हो ।
धवलागिरि गाउँपालिकामा निर्माणाधीन ५३ दशमलव ५ मेगावाट क्षमताको अपर म्याग्दी–१, ३७ मेगावाटको माथिल्लो म्याग्दी, ६५ मेगावाटको म्याग्दी खोला, १४ मेगावाटको मुदीखोला र ६ दशमलव ५ मेगावाटको दरखोला जलविद्युत् आयोजनाको निर्माणमा बाढीपहिरोले प्रत्यक्ष असर पारेको छ । यस्तै, अन्नपूर्ण गाउँपालिका–४ नारच्याङमा निर्माणाधीन ९ दशमलव १४ मेगावाटको सुपर घलेम्दी जलविद्युत् आयोजनाको निर्माणस्थलसँग पनि यातायात सम्पर्क विच्छेद भएको छ ।
अविरल वर्षाका कारण नारच्याङको रेलेखर्क क्षेत्रबाट आएको बाढी बाँध क्षेत्रमा थुप्रिएपछि ६ मेगावाट क्षमताको रेलेखोला जलविद्युत् आयोजना गत असार अन्तिम सातादेखि बन्द छ । यसैगरी, गत साउन २६ गते आएको सुक्खा पहिरोले विद्युत् गृह पुरिएपछि अन्नपूर्ण गाउँपालिका–६ मा रहेको १४ मेगावाटको खारखोला जलविद्युत् आयोजनाको विद्युत् उत्पादन पनि ठप्प भएको छ । पहिरोमा परी एक जनाको मृत्यु भएको थियो भने एक जना घाइते भएका थिए ।
अपर म्याग्दी–१ का आयोजना प्रमुख ज्योतिकुमार केसीका अनुसार घुमाउने (फापरखेत), बाङ्गेपहिरो र इल्पु क्षेत्रमा पहिरो तथा शिवरात्रि खोलामा आएको बाढीका कारण गत असारदेखि सिमेन्ट, रडलगायत निर्माण सामग्री तथा उपकरण बोकेका सवारीसाधन आयोजना स्थलसम्म पुग्न सकेका छैनन् । उपलब्ध उपकरण र मौज्दात सामग्री प्रयोग गरेर निर्माणलाई निरन्तरता दिइए पनि ढुवानीमा आएको समस्याले कामको गति अपेक्षाअनुसार अघि बढ्न नसकेको उनले बताए ।
शिवरात्रि खोलामा पूर्वाधार विकास कार्यालयमार्फत निर्माण भइरहेको मोटरेबल पुलमा ढिलाइ हुँदा वर्षायाममा सवारीसाधन आवतजावतमा थप समस्या भएको छ । बाढीका कारण खोलाको सतह बढ्ने र पहुँचमार्गमा पहिरो खस्ने समस्याले म्याग्दी खोला जलविद्युत् आयोजनाको काममा समेत असर परेको आयोजनाका जनसम्पर्क अधिकृत बुद्धिराज अधिकारीले बताए ।
उनका अनुसार वैकल्पिक उपाय अपनाउँदै मौज्दात सामग्री परिचालन गरेर काम अघि बढाइएको छ । कतिपय स्थानमा डोजरको सहयोगमा सामान बोकेका सवारीसाधन तार्ने तथा पहिरो पन्छाएर आवागमन सञ्चालन गर्नुपर्ने अवस्था रहेको उनले जानकारी दिए ।
६० प्रतिशत भौतिक प्रगति हासिल गरिसकेको माथिल्लो म्याग्दी जलविद्युत् आयोजना पनि बाढीपहिरोबाट प्रभावित भएको छ । ३७ मेगावाट क्षमताको उक्त आयोजनालाई क्षमता बढाएर ४६ दशमलव २५ मेगावाट बनाउने प्रक्रिया अघि बढिरहेको छ ।
त्यस्तै, बेनी–दरबाङ तथा दरबाङ–धारापानी–ताकम–मुना सडकखण्डका थापाचौर, गौथली र दाचौर भिरमा गएको पहिरोका कारण निर्माण सामग्री ढुवानी गर्न नसकिएको दरखोला हाइड्रोपावरका अध्यक्ष रेशम भण्डारीले बताए । बाढीपहिरोका कारण सडक अवरुद्ध हुँदा आयोजनाहरूको निर्माण अवधि लम्बिन सक्ने र लागतसमेत बढ्न सक्ने जोखिम देखिएको छ ।
