काठमाडौं । नेकपा एमालेले जनआस्था साप्ताहिकका अध्यक्ष किशोर श्रेष्ठको पक्राउ तथा उनको घर र कार्यालयमा गरिएको खानतलासीप्रति आपत्ति जनाएको छ । प्रतिनिधिसभाको सोमबारको बैठकमा एमाले सांसद राजेन्द्रकुमार राईले श्रेष्ठमाथिको व्यवहार अभिव्यक्ति स्वतन्त्रतामाथिको हस्तक्षेप भएको बताए ।
राईले सरकार अधिनायकवादतर्फ उन्मुख भएको आरोप लगाउँदै लोकतन्त्रमा नागरिकलाई लेख्ने र बोल्ने अधिकार रहेको बताए । उनले पत्रकार पक्राउ गर्नुअघि कानुनी प्रक्रिया पूरा गर्नुपर्ने भन्दै सरकारले नागरिकको जिउधनको सुरक्षा गर्नुपर्नेमा उल्टै असुरक्षा सिर्जना गरिरहेको आरोप लगाए।
‘साउन २७ गते जनआस्थाका सम्पादक किशोर श्रेष्ठलाई पक्रिएको छ । उसलाई पक्रिसकेपछि उसको घरमा खानतलासी गरियो, उसको ल्यापटपसमेत जफत गरियो,’ उनले भने ।
राईले पत्रकार श्रेष्ठलाई के आरोपमा पक्राउ गरिएको हो भन्ने स्पष्ट हुनुपर्ने भन्दै सरकारसँग प्रश्न गरे ।
श्रेष्ठलाई साउन २७ गते सप्तरीका अमरकान्त चौधरीको उजुरीका आधारमा पक्राउ गरिएको थियो । उनी हाल न्यायिक हिरासतमा छन् ।
