पाँचथर, १४ भाद्र । पाँचथरको फालेलुङ गाउँपालिका-५ मा बिहीबार साँझ भएको विस्फोटमा परेर दाजुबहिनीको निधन भएको छ ।
विस्फोटक पदार्थ विस्फोट हुँदा घाइते भएका चार बालबालिका मध्ये २ वर्षीया प्रिन्सा साँवाको उपचारका क्रममा झापाको बि एण्ड सीअस्पताल लग्दै गर्दा बाटोमा मृत्यु भएको जिल्ला प्रहरी कार्यालय पाँचथरका सूचना अधिकारी प्रहरी निरीक्षक बिना लाल साह तेलीले केटिएम दैनिकलाई बताए।
त्यस्तै विस्फोटमा परी गम्भिर घाइते भएका ११ वर्षीय दिपशन साँवाको उपचारको क्रममा सोही अस्पतालमा निधन भएको छ ।
दिपशन र प्रिन्सा दाजुबहिनी हुन् ।
त्यसैगरी ११ वर्षीय पबन राईको जिल्ला अस्पताल पाँचथरमा उपचार भइरहेको छ । ७ वर्षीय दिपशन राई सामान्य घाइते भएकाले स्थानीय स्वास्थ्य चौकी प्राङबुङमा उपचार भइरहेको जिल्ला प्रहरी कार्यालय पाँचथरले जनाएको छ ।
डाडागाउँ भन्ने स्थानमा आइतराज केरुङको घरमा विष्फोट भएको थियो। सुरक्षा निकायले यसलाई ‘होममेड ग्रिनेट’ को विस्फोट भएको अनुमान गरेको छ ।
माओवादीको द्वन्दकालमा यो घर सेल्टरको रुपमा प्रयोग भएकोले त्यति बेलाकै ग्रिनेड हुनसक्ने प्रहरीले अनुमान गरेको छ ।
सम्बन्धित समाचार
