काठमाडौँ। विश्व पोलियो दिवसका अवसरमा पोलियो उन्मूलनबारे जनचेतना अभिवृद्धि गर्न कात्तिक ७ गते काठमाडौँ उपत्यकामा ‘मेगा पोलियो साइकल र्याली’ आयोजना हुने भएको छ।
रोटरी इन्टरनेसनल नेपाल–भुटान डिष्ट्रिक्ट ३२९२ को आयोजनामा हुने र्याली भक्तपुर दरबार स्क्वायरबाट सुरु भई काठमाडौँ दरबार स्क्वायर, पशुपतिनाथ, बौद्ध र स्वयम्भू हुँदै पाटन दरबार स्क्वायरमा पुगेर समापन हुनेछ। रोटरीको पोलियो प्लस उपसमितिका अध्यक्ष बिनिता हाडाले जारी गरेको प्रेस विज्ञप्तिमा र्यालीले उपत्यकाका सात ऐतिहासिक तथा सांस्कृतिक सम्पदालाई जोड्ने उल्लेख छ।
र्यालीमार्फत पोलियोविरुद्धको खोपको महत्त्व, जनस्वास्थ्यसम्बन्धी चेतना र पोलियो उन्मूलनका लागि सामूहिक प्रतिबद्धताको सन्देश प्रवाह गर्ने लक्ष्य राखिएको आयोजकले जनाएको छ।
पोलियो भाइरसले स्नायु प्रणालीमा असर पुर्याएर मांसपेशी कमजोर बनाउनुका साथै पक्षाघातसमेत गराउन सक्छ। यसबाट बालबालिकालाई जोगाउन पाँच वर्षमुनिका सबै बालबालिकालाई पोलियोविरुद्धको खोप लगाउन महत्त्वपूर्ण मानिन्छ।
नेपाल सरकारले देशभरका बालबालिकाका लागि निःशुल्क पोलियो खोपको व्यवस्था गर्दै आएको छ।
