काठमाडौं । हाईलाइफ एग्रो एण्ड फुड्स इण्डष्ट्रिज लिमिटेडको ११औँ वार्षिक साधारणसभा सम्पन्न भएको छ। नेपाली खाद्य उत्पादनलाई अन्तर्राष्ट्रिय बजारमा विस्तार गर्ने रणनीतिअनुसार कम्पनीले अमेरिका, युरोप, अस्ट्रेलिया, जापान, दक्षिण कोरिया र संयुक्त अरब इमिरेट्स (यूएई) लगायतका मुलुकमा आफ्ना उत्पादन पुर्याउँदै आएको छ।
कम्पनीका अध्यक्ष अम्बिकाप्रसाद पौडेलले साधारणसभामा प्रस्तुत गरेको प्रतिवेदनअनुसार प्रतिकूल व्यावसायिक वातावरणका बाबजुद कम्पनीले बजार पहुँच कायम राख्दै दीर्घकालीन व्यावसायिक आधार सुदृढ बनाउने प्रयास गरेको छ। कम्पनीले हाल ३५० भन्दा बढीलाई प्रत्यक्ष रोजगारीसमेत प्रदान गरेको छ।
अध्यक्ष पौडेलले ‘जहाँ नेपाली त्यहाँ नेपाली उत्पादन’ भन्ने नारासहित स्वदेशी उत्पादनलाई अन्तर्राष्ट्रिय बजारमा स्थापित गर्ने अभियानले सकारात्मक गति लिएको बताए। उनका अनुसार निर्यात विस्तारले कम्पनीको बजार पहुँच बढाउनुका साथै विदेशी मुद्रा आर्जनमार्फत राष्ट्रिय अर्थतन्त्रमा योगदान पुर्याएको छ। यसले एउटै बजारमाथिको निर्भरता घटाउनसमेत सहयोग गरेको छ।
काठमाडौंको बुढानीलकण्ठस्थित होटल लेमन ट्री प्रिमियरमा सम्पन्न साधारणसभामा आर्थिक वर्ष २०८२/८३ को व्यावसायिक कार्यसम्पादन, वित्तीय अवस्था तथा आगामी रणनीतिबारे छलफल भएको थियो।
अध्यक्ष पौडेलले आर्थिक वर्ष २०८२/८३ मुलुक तथा विश्व अर्थतन्त्रका लागि उतारचढावपूर्ण रहेको उल्लेख गरे। भदौमा भएको जेनजी आन्दोलनले नेपालको सामाजिक, राजनीतिक तथा आर्थिक वातावरणमा प्रभाव पारेको र अन्तर्राष्ट्रियस्तरमा बढेको भूराजनीतिक तनाव, विशेषगरी मध्यपूर्वको द्वन्द्वले ऊर्जा, ढुवानी, कच्चा पदार्थ तथा खाद्य आपूर्ति शृङ्खलामा दबाब सिर्जना गरेको उनको भनाइ छ।
आयातमा निर्भर नेपालको अर्थतन्त्रमा अन्तर्राष्ट्रिय घटनाक्रमले उत्पादन लागत, कच्चा पदार्थको उपलब्धता र बजार पहुँचमा प्रत्यक्ष प्रभाव पार्ने भएकाले उद्योग सञ्चालन चुनौतीपूर्ण बनेको उनले बताए। यद्यपि, कम्पनीले लागत नियन्त्रण, कार्यगत दक्षता अभिवृद्धि तथा स्वदेशी कच्चा पदार्थको प्रयोग बढाउने प्रयासलाई निरन्तरता दिएको प्रतिवेदनमा उल्लेख छ।
अन्तर्राष्ट्रिय बजारमा ‘हाईलाइफ’ ब्राण्ड विस्तार
कम्पनीले स्वदेशी बजारमा स्थापित ‘हाईलाइफ’ ब्राण्डलाई अन्तर्राष्ट्रिय बजारमा समेत पहिचान दिलाउने लक्ष्य लिएको छ। अमेरिका, जापान, अस्ट्रेलिया, युरोप, दक्षिण कोरिया र यूएईलगायतका बजारमा उत्पादन पुर्याउनुलाई कम्पनीले बजार विस्तारको महत्त्वपूर्ण उपलब्धिका रूपमा लिएको छ।
अध्यक्ष पौडेलका अनुसार पछिल्लो समय उपभोक्ताले स्वादसँगै पोषण, खाद्य सुरक्षा, स्वच्छता र सहज उपलब्धतालाई समेत प्राथमिकता दिन थालेका छन्। उपभोक्ताको बदलिँदो चाहना र आवश्यकतालाई ध्यानमा राख्दै कम्पनीले गुणस्तरीय, पोषणयुक्त र सर्वसुलभ खाद्य वस्तु उपलब्ध गराउने लक्ष्य अघि बढाएको छ।
उनले ‘हाईलाइफ’ ब्राण्ड उपभोक्ताको विश्वास र आत्मीयतासँग जोडिएको उल्लेख गर्दै यसलाई कम्पनीको व्यावसायिक सफलताभन्दा पनि वर्षौँदेखि उपभोक्ताले देखाउँदै आएको भरोसाको प्रतिफलका रूपमा व्याख्या गरे।
अन्तर्राष्ट्रिय बजारमा पहुँच बढेसँगै गुणस्तर र खाद्य सुरक्षाप्रतिको जिम्मेवारी पनि बढ्ने भएकाले कच्चा पदार्थ छनोटदेखि उत्पादन, प्रशोधन, प्याकेजिङ, भण्डारण र वितरणसम्मका सबै चरणमा गुणस्तर कायम गर्ने विषयलाई कम्पनीले प्राथमिकतामा राखेको छ।
स्वदेशी कृषि र रोजगारीमा जोड
हाईलाइफले उत्पादन तथा बिक्रीमा मात्र सीमित नभई नेपाली कृषि उत्पादनलाई उद्योगसँग जोड्ने, स्थानीय स्रोतको उपयोग बढाउने र आपूर्ति प्रणालीलाई व्यवस्थित बनाउने रणनीति लिएको छ।
कम्पनीले ३५० भन्दा बढीलाई प्रत्यक्ष रोजगारी प्रदान गर्दै आएको उल्लेख गर्दै अध्यक्ष पौडेलले युवालाई स्वदेशमै अर्थपूर्ण र दीर्घकालीन रोजगारीका अवसर उपलब्ध गराउनु पनि कम्पनीको प्राथमिकता रहेको बताए।
त्यसैगरी उद्योगसँग आबद्ध कृषक, आपूर्तिकर्ता तथा व्यावसायिक साझेदारको क्षमता अभिवृद्धि र बजार पहुँच विस्तारमा कम्पनीले जोड दिएको छ। स्वदेशी कच्चा पदार्थ र स्थानीय सीपमा आधारित उद्योगले रोजगारी सिर्जना गर्नुका साथै कृषि उत्पादनको मूल्य अभिवृद्धि र राष्ट्रिय अर्थतन्त्रमा योगदान पुर्याउने पौडेलको भनाइ छ।
बजार विस्तार र नयाँ उत्पादन विकास गर्ने योजना
कम्पनीले आगामी दिनमा स्वदेशी बजारमा वितरण सञ्जाल विस्तार गरी बजार हिस्सा बढाउने रणनीति अघि सारेको छ। उपभोक्ताको रुचि तथा स्वास्थ्यप्रतिको बढ्दो सचेततालाई ध्यानमा राख्दै नयाँ र पोषणयुक्त उत्पादन विकास गर्ने योजना पनि बनाएको छ।
त्यस्तै, निर्यात बजार विस्तार गर्ने, विदेशमा बिक्री हुने उत्पादनको दायरा बढाउने, स्वदेशी कच्चा पदार्थको उपयोग वृद्धि गर्ने तथा कृषकसँगको साझेदारीलाई थप सुदृढ बनाउने कम्पनीको प्राथमिकता रहेको छ। प्रविधि र सञ्चालन प्रक्रियामा सुधार गरी उत्पादकत्व बढाउने तथा लागत घटाउने रणनीतिसमेत प्रतिवेदनमा समेटिएको छ।
यी योजनामार्फत दीर्घकालीन व्यावसायिक वृद्धि हासिल गर्दै सेयरधनीको लगानीमा उचित र स्थिर प्रतिफल सुनिश्चित गर्ने लक्ष्य कम्पनीले लिएको छ।
अध्यक्ष पौडेलले कम्पनीप्रति विश्वास राख्ने सेयरधनी, उपभोक्ता, वितरक, विक्रेता, कृषक, आपूर्तिकर्ता, कर्मचारी तथा व्यावसायिक साझेदारप्रति आभार व्यक्त गर्दै आगामी दिनमा गुणस्तर, विश्वास र नवीनतालाई आधार बनाएर नेपाली उत्पादनलाई विश्व बजारमा स्थापित गर्ने प्रतिबद्धता व्यक्त गरे।
