काठमाडौँ । स्वास्थ्य तथा जनसङ्ख्या मन्त्रालयले शासकीय सुधारअन्तर्गत तय गरिएको एक सय बुँदे कार्ययोजनाको कार्यान्वयनलाई अगाडि बढाउँदै स्वास्थ्य सेवा प्रणाली सुधारमा अनुगमन गतिविधि विस्तार गरेको छ।
गुणस्तरीय स्वास्थ्य सेवा सुनिश्चित गर्ने उद्देश्यसहित मन्त्रालयले विभिन्न स्वास्थ्य संस्थामा नियमित अनुगमन सञ्चालन गर्दै आवश्यक सुधारका लागि निर्देशन जारी गरेको जनाएको छ।
सोही क्रममा सोमबार गुणस्तर मापन तथा नियमन महाशाखाका प्रमुख डा. रोशन न्यौपानेको नेतृत्वमा काठमाडौँको महाराजगन्जस्थित कान्ति बाल अस्पतालको निरीक्षण गरिएको थियो। अनुगमनपछि अस्पताललाई सुधारात्मक कदम चाल्न औपचारिक रूपमा पत्राचार गरिएको छ।
मन्त्रालयले अस्पतालमा ओपिडी, आकस्मिक सेवा, फार्मेसी तथा रेडियोलोजी सेवामा बिरामीको प्रतीक्षा समय घटाउने व्यवस्था गर्न निर्देशन दिएको छ। त्यस्तै, सेवा लिने नागरिकप्रति सम्मानजनक र मैत्रीपूर्ण व्यवहार सुनिश्चित गर्न पनि स्पष्ट आग्रह गरिएको छ।
आकस्मिक अवस्थामा आवश्यक जनशक्ति उपलब्ध गराउने, सरसफाइ तथा सुरक्षा व्यवस्थापन सुदृढ गर्ने, र कर्मचारीको नियमित उपस्थितिलाई कडाइका साथ लागू गर्ने विषयमा पनि मन्त्रालयले जोड दिएको छ। साथै, अस्पतालका उपकरणहरू सञ्चालन योग्य अवस्थामा राख्न तथा ओपिडी समयमा औषधि प्रतिनिधिहरूको प्रवेश नियन्त्रण गर्नसमेत निर्देशन दिइएको छ।
यसअघि मन्त्रालयले भेरी अस्पताल, नारायणी अस्पताल, बीपी कोइराला स्वास्थ्य विज्ञान प्रतिष्ठान र गजेन्द्रनारायण सिंह अस्पतालमा समेत अनुगमन सम्पन्न गरिसकेको जनाएको छ।
