काठमाडौं । पोखरा महानगरपालिकाका प्रमुख धनराज आचार्यले प्रधानमन्त्रीको आसन्न भारत भ्रमणका क्रममा पोखरा अन्तर्राष्ट्रिय विमानस्थलबाट भारतका प्रमुख सहरमा सिधा हवाई सेवा सञ्चालन गर्ने विषयलाई प्राथमिकताका साथ उठाउन आग्रह गरेका छन्।
उनले सिमराबाहेक थप तीनवटा हवाई प्रवेश रुट उपलब्ध गराउने विषयमा भारतसँग ठोस सहमति गर्नुपर्नेमा जोड दिएका हुन्।
आचार्यका अनुसार थप हवाई प्रवेश रुटको व्यवस्था भए पोखरा अन्तर्राष्ट्रिय विमानस्थलबाट भारतका विभिन्न प्रमुख सहरमा सिधा उडान सञ्चालन गर्न सहज हुनेछ। यसबाट पोखरा तथा समग्र गण्डकी प्रदेशको पर्यटन प्रवर्द्धनसँगै आर्थिक गतिविधि विस्तारमा महत्वपूर्ण योगदान पुग्ने उनको विश्वास छ।
त्यसैगरी, उनले पोखरा–सुनौली फास्ट ट्रयाक निर्माणको विषयलाई पनि प्रधानमन्त्रीको भारत भ्रमणको प्राथमिकताप्राप्त एजेन्डामा समावेश गरिएकोप्रति खुसी व्यक्त गरेका छन्।
यी दुवै विषयमा पारस्परिक सम्मान, समान अधिकार र असल छिमेकीको भावनाअनुसार ठोस सहमति हुनुपर्ने उल्लेख गर्दै आचार्यले विगतमा जस्तै विभिन्न बहानामा निर्णय प्रक्रियालाई नटार्न आग्रह गरेका छन्।
प्रधानमन्त्रीको भारत भ्रमणबाट पोखराको अन्तर्राष्ट्रिय हवाई सम्पर्क विस्तार र पोखरा–सुनौली फास्ट ट्रयाक निर्माणका विषयमा सकारात्मक तथा परिणाममुखी निर्णय हुने विश्वाससमेत उनले व्यक्त गरेका छन्।