महेन्द्रनगर । सुदूरपश्चिम प्रदेशको प्रमुख पर्यटकीय गन्तव्य कञ्चनपुरस्थित शुक्लाफाँटा राष्ट्रिय निकुञ्जमा पछिल्लो समय आन्तरिक तथा बाह्य पर्यटकको आगमन बढेको छ। दसैँलगायतका चाडपर्व मनाउन घर फर्किएका तथा बिदा मनाउन निस्किएका पर्यटक निकुञ्ज अवलोकनका लागि पुग्न थालेका छन्।
शुक्लाफाँटा राष्ट्रिय निकुञ्जका रेञ्जर विक्रम चौधरीका अनुसार असोज २८ गतेदेखि कात्तिक ९ गतेसम्म १३ दिनको अवधिमा ५९० जना पर्यटकले निकुञ्जको भ्रमण गरेका छन्।
“वर्षायाममा निकुञ्ज प्रवेश बन्द थियो। असोजको अन्तिम सातादेखि मात्रै खुला गरिएको हो”, चौधरीले भने, “चाडपर्वका बेला घर आएका कञ्चनपुरसहित सुदूरपश्चिम र देशका विभिन्न स्थानका पर्यटक यहाँ आउने क्रम बढेको छ।”
करिब ३०५ वर्ग किलोमिटर क्षेत्रफलमा फैलिएको शुक्लाफाँटा राष्ट्रिय निकुञ्ज विश्वमै ठूलो बाह्रसिङ्गाको झुण्ड अवलोकन गर्न पाइने स्थलका रूपमा परिचित छ। सीमित क्षेत्रफलमा धेरै पाटेबाघ पाइने निकुञ्जमध्ये पनि यो एक हो।
निकुञ्ज कार्यालयका अनुसार यहाँ दुई हजार ३०० भन्दा बढी बाह्रसिङ्गा, ५० वटा पाटेबाघ, २० भन्दा बढी गैँडा तथा साढे चार सयभन्दा बढी प्रजातिका चराचुरुङ्गी पाइन्छन्। जैविक विविधता र वन्यजन्तु अवलोकनका लागि शुक्लाफाँटा महत्वपूर्ण पर्यटकीय गन्तव्यका रूपमा स्थापित हुँदै गएको छ।
निकुञ्ज खुला भएयता सोमबारसम्म ५६० जना आन्तरिक, सार्क मुलुकका २३ जना र अन्य मुलुकका सात जना पर्यटकले भ्रमण गरेको रेञ्जर चौधरीले जानकारी दिए।
निकुञ्ज प्रवेशका लागि आन्तरिक पर्यटकले प्रतिव्यक्ति १०० रुपैयाँ, सार्क राष्ट्रका पर्यटकले ७५० रुपैयाँ र अन्य विदेशी पर्यटकले एक हजार ५०० रुपैयाँ शुल्क तिर्नुपर्ने व्यवस्था रहेको कार्यालयले जनाएको छ।
काम, अध्ययनलगायतका कारण जिल्लाबाहिर बस्दै आएका कञ्चनपुरका नागरिक पनि बिदाका बेला निकुञ्ज घुम्न आउने गरेको चौधरीले बताए। उनका अनुसार निकुञ्जको प्रचारप्रसार र पर्यटक प्रवर्द्धनका लागि विभिन्न प्रयास भइरहेका छन्।
कञ्चनपुर उद्योग वाणिज्य सङ्घका अध्यक्ष दिनेश मल्लले जिल्लाका विभिन्न पर्यटकीयस्थलमा पछिल्लो समय आन्तरिक पर्यटकको चहलपहल बढेको बताए। उनका अनुसार शुक्लाफाँटा राष्ट्रिय निकुञ्जसँगै महाकाली नदीमाथिको चार लेनको पक्की पुल, झोलुङ्गे पुल, बेदकोट ताल र झिलमिला तालमा समेत पर्यटकको आवागमन बढेको छ।
त्यसैगरी, पश्चिमी नाका गड्डाचौकी हुँदै भारतको नैनीताल र कैँची धाम भ्रमणमा जाने नेपालीको सङ्ख्यामा पनि वृद्धि भएको मल्लले बताए।
पर्यटकको आगमन बढेसँगै पर्यटकीयस्थलमा यातायात, आवास तथा सुरक्षाको उचित प्रबन्ध मिलाउन सम्बन्धित निकायले ध्यान दिनुपर्नेमा उनले जोड दिए।
