काठमाडौं। संसदीय सुनुवाइ समितिले भारत, चीन, अमेरिकासहित १० देशका लागि प्रस्तावित राजदूतको नाम अनुमोदन गरेको छ। समितिको बुधबार सिंहदरबारमा बसेको बैठकले मलेसिया र साउदी अरबका लागि प्रस्तावित राजदूतको नाम भने अस्वीकृत गरेको छ।
समिति सभापति बोधनारायण श्रेष्ठका अनुसार भारतका लागि डा. निश्चलनाथ पाण्डे, चीनका लागि डा. कल्याणराज शर्मा, अमेरिकाका लागि चिरनजंग थापा, बेलायतका लागि गौरवशमशेर राणा र जर्मनीका लागि सरू जोशीको नाम अनुमोदन भएको छ।
त्यसैगरी इजरायलका लागि सुरेशकुमार कर्ण, स्पेनका लागि प्राप्ति शेरचन, ओमानका लागि डा. पद्माक्षी राणा, दक्षिण कोरियाका लागि प्राध्यापक डा. संगम श्रेष्ठ र श्रीलंकाका लागि डा. मञ्चलाकुमारी झाको नाम पनि समितिले अनुमोदन गरेको छ।
समितिले मलेसियाका लागि प्रस्तावित राजदूत चुडामणि खरेल र साउदी अरबका लागि प्रस्तावित राजदूत गिरीबहादुर सुनारको नाम भने अस्वीकृत गरेको छ।
असोज २ गते बसेको मन्त्रिपरिषद्को बैठकले १३ देशका लागि राजदूत सिफारिस गरेको थियो ।
