काठमाडौं। राष्ट्रिय स्वतन्त्र पार्टीकी सांसद रञ्जु न्यौपानेले स्वास्थ्य बीमा कार्यक्रम प्रभावकारी रूपमा सञ्चालन गर्न सरकारको ध्यानाकर्षण गराएकी छन्। स्वास्थ्य बीमाको सुविधा सहज रूपमा नपाउँदा सर्वसाधारण मर्कामा परेको भन्दै उनले तत्काल सुधार गरेर नागरिकलाई स्वास्थ्य सेवा उपलब्ध गराउन माग गरेकी हुन्।
मंगलबार प्रतिनिधिसभाको बैठकमा बोल्दै न्यौपानेले स्वास्थ्य बीमा कार्यक्रम लथालिंग हुँदा नागरिक बिचल्लीमा परेको बताइन्। ‘स्वास्थ्य बीमा के गरेर हो, कसरी हो सञ्चालनमा ल्याइदिनुपर्यो, नागरिकहरू बिचल्लीमै परिसके,’ उनले भनिन्।
उनले स्वास्थ्य बीमामार्फत नागरिकले सहज र प्रभावकारी स्वास्थ्य सेवा पाउने व्यवस्था सुनिश्चित गर्न सरकारको ध्यानाकर्षण गराइन्।
बैठकमा न्यौपानेले थापाथलीस्थित परोपकार प्रसूति गृहको पछाडि फोहोर प्रशोधन केन्द्र निर्माण गर्न लागिएको विषय पनि उठाइन्। कुनै सूचना वा जानकारी नदिई बाटोसमेत ढाकेर निर्माण गर्न लागिएको भन्दै उनले आमा र बच्चाको स्वास्थ्यलाई ध्यानमा राखेर उक्त क्षेत्रमा केन्द्र निर्माण नगर्न माग गरिन्।
यस्तै, नेपाल राष्ट्र बैंकमा सुन धितो राखेर ऋण लिएका नागरिकको समस्या समाधान गर्न पनि उनले माग गरिन्। राष्ट्र बैंकबाट सुन लुटिएको भनिएको घटनाका पीडितले हालसम्म सुन फिर्ता वा बजार मूल्यअनुसार क्षतिपूर्ति नपाएको बताउँदै उनले तत्काल समस्या समाधान गर्न सरकारको ध्यानाकर्षण गराइन्।
