काठमाडौं -बागमती प्रदेश सरकारमा सहभागी नेकपा एमालेका ६ जना मन्त्रीले सामूहिक रूपमा राजीनामा दिएका छन्। राजीनामासँगै एमाले सरकारबाट बाहिरिएको छ भने सरकारलाई दिएको समर्थन पनि फिर्ता लिएको छ।
केन्द्रीय निर्देशनअनुसार बुधबार एमालेका मन्त्रीहरूले मुख्यमन्त्री तथा मन्त्रिपरिषद्को कार्यालयमा राजीनामा पत्र दर्ता गराएका हुन्।
एमाले बागमती प्रदेश संसदीय दलका नेता जगन्नाथ थपलियाका अनुसार सोमबार काठमाडौंमा बसेको संसदीय दलको बैठकले पार्टीको औपचारिक निर्णय नआएसम्म सरकार नछाड्ने निष्कर्ष निकालेको थियो। तर मंगलबार केन्द्रबाट सरकारबाट बाहिरिने निर्देशन आएपछि मन्त्रीहरूले सामूहिक रूपमा पद त्याग गरेका हुन्।
मन्त्रीहरूले सुरुमा मुख्यमन्त्री इन्द्रबहादुर बानियाँलाई भेटेरै राजीनामा बुझाउने तयारी गरेका थिए। तर मुख्यमन्त्री चितवनबाट फर्किन ढिलाइ भएपछि उनीहरूले मुख्यमन्त्री तथा मन्त्रिपरिषद्को कार्यालयमै राजीनामा पत्र दर्ता गराएका हुन्।
एमालेको तर्फबाट बागमती प्रदेश सरकारमा डा. दिनेशचन्द्र देवकोटा, भरत केसी, जयराम थापा, मधुसूदन पौडेल, किरण थापा र बिन्दु श्रेष्ठ मन्त्रीका रूपमा कार्यरत थिए।
नयाँ आर्थिक वर्ष २०८३/८४ सुरु भएसँगै प्रदेश सरकारले मन्त्रालयको संख्या १४ बाट घटाएर ८ मा सीमित गरेको थियो। मन्त्रालय पुनर्संरचनापछि एउटै मन्त्रालयमा तीन जनासम्म मन्त्रीलाई विषयगत जिम्मेवारी बाँडेर काम गर्ने व्यवस्था लागू गरिएको थियो।
तर मन्त्रालय पुनर्गठन भएको एक सातामै कांग्रेस–एमालेबीचको सत्ता सहकार्य अन्त्य भएको छ। एमाले सरकारबाट बाहिरिएसँगै मुख्यमन्त्री इन्द्रबहादुर बानियाँ नेतृत्वको सरकार अल्पमतमा परेको छ।
यस घटनापछि बागमती प्रदेशमा नयाँ सत्ता समीकरण निर्माणको प्रक्रिया अघि बढ्ने संकेत देखिएको छ।
