काभ्रे, १३ चैत । गाडी ब्याक गर्ने क्रममा किचिएर सोही सवारीसाधनका चालकको छोरीको निधन भएको छ ।
आज बनेपा नगरपालिका-४ त्रिवेणी चोकमा रहेको शुभकामना सप्लायर्सको डिपो भित्र बा ८ ख ८५९२ नम्बरको निशान गाडी ब्याक गर्ने क्रममा उक्त गाडीले बालिकालाई ठक्कर दिएको थियो ।
गिटी बालुवामा खेलिरहेकी चार वर्षीया बालिका समीक्षा बराललाई उनकै बुवा सरोज बरालले चलाएको गाडिले ठक्कर दिएको जिल्ला प्रहरी कार्यालय काभ्रेका प्रवक्ता प्रहरी नायव उपरीक्षक मिन बहादुर घलेले बताए ।
घाइते बालिकालाई तत्काल उपचारको लागि धुलिखेल अस्पताल लगिएकोमा अस्पताले मृत घोषित गरेको हो ।
घटनास्थलमा प्रहरी चौकी नालाबाट खटिएको प्रहरीले सवारी साधनलाई इलाका प्रहरी कार्यालय बनेपामा ल्याएर अनुसन्धान गरिरहेको जनाएको छ ।
