
पोखरा, ४ कात्तिक । राष्ट्रिय स्वतन्त्र पार्टी (रास्वपा) का सभापति रवि लामिछाने पक्राउ परेपछि कास्की प्रशासनले पोखराका दुई स्थानमा निषेधित क्षेत्र घोषणा गरेको छ ।
जिल्ला प्रशासन कार्यालय कास्कीका प्रमुख जिल्ला अधिकारी भरतमणि पाण्डेले बिहान पौने १२ बजेदेखि अर्को आदेश नभएसम्मका लागि निषेधित क्षेत्र घोषणा गरेका हुन् ।
पोखरास्थित सहिद चोक आसपास क्षेत्र र गैह्रापाटन आसपास क्षेत्रलाई निषेधित क्षेत्र घोषणा गरिएको कास्की प्रशासनले जनाएको छ ।
सहित चोक आसपास क्षेत्रमा पूर्वतर्फ वाई चोक, पश्चिमतर्फ फिस्टेल चोक, उत्तरतर्फ मालपोत कार्यालय र दक्षिणतर्फ मुस्ताङ चोकसम्मलाई निषेधित क्षेत्र घोषणा गरिएको छ । यस्तै गैह्रापाटन आसपासका क्षेत्रमा पालिखेचोकदेखि नविल माविसम्मको सडक क्षेत्रलाई निषेधित क्षेत्र घोषणा गरिएको छ ।
निषेधाज्ञा घोषित क्षेत्रमा ५ जनाभन्दा बढी भेला भएमा कानुन बमोजिम कारबाही हुने प्रशासनले जारी गरेको सूचनामा उल्लेख गरिएको छ ।
पोखराको सूर्यदर्शन बचत तथा ऋण सहकारी संस्थाको रकम अपचलनमा संलग्न भएको आरोपमा अनुसन्धान गर्न प्रहरीले रास्वपा सभापति लामिछानेलाई पक्राउ गरेर पोखरा ल्याएपछि रास्वपा कार्यकर्ता प्रदर्शनमा उत्रिएका छन् ।
यता सहकारी पीडितहरु पनि आन्दोलनमा रहेकाले दुई पक्षबीच हुनसक्ने झडपलाई मध्यनजर गर्दै उक्त क्षेत्रहरुमा निषेधाज्ञा जारी गरिएको हो ।
जिल्ला अदालत वरपर रास्वपाका कार्यकर्ता तथा सहकारीपीडित दुवै पक्षले आइतबार प्रदर्शनको पूर्व तयारी गरेका थिए । सो क्षेत्रमा अहिले पनि मानिसको ठूलो भीड लोको छ ।
सहकारी ठगी तथा संगठित अपराध मुद्दामा शुक्रबार काठमाडौंमा पक्राउ परेका लामिछानेलाई रारारात पोखरा ल्याएर प्रहरी हिरासतमा राखिएको छ । शनिबार सार्वजनिक बिदा परेकाले आइतबार म्याद थपका लागि अदालत उपस्थित गराइँदैछ ।