
काठमाडौं, २२ असोज । केहीदिनअघि आएको बाढी र पहिरोबाट प्रभावित परिवारका लागि आपतकालीन राहत सामग्रीको खेप नेपाल आइपुगेको छ ।
छिमेकी मुलुक भारतका तर्फबाट द्वितीय सचिव नारायण सिंहले बाँकेका प्रमुख जिल्ला अधिकारी खगेन्द्र प्रसाद रिजाललाई हिजो (सोमबार) नेपालगञ्जमा उक्त राहत सामाग्री हस्तान्तरण गरेका हुन् ।
टारपोलिन, स्लीपिङ्ग ब्याग, कम्बल, क्लोरिन ट्याब्लेट र पानीका बोतल सहितको ४.२ टनको उक्त मानविय सहायताको खेप भारतबाट नेपालगन्ज ल्याइएको थियो । यसबाहेक अत्यावश्यक सरसफाई सामाग्री तथा औषधीका साथसाथै अन्य राहत सामाग्रीको पनि व्यवस्था छिट्टै उपलब्ध हुने भारतीय राजदूतावासले जनाएको छ ।
२०७२ सालको भूकम्प वा अघिल्लो वर्ष जाजरकोटमा गएको भूकम्पमा पनि छिमेकी मुलुकले राहत सामाग्री उपलब्ध गराएको दूतावासले जारी गरेको विज्ञप्तीमा उल्लेख छ ।
साथै हालै आएको बाढी र पहिरोले निम्त्याएको विनाशमा नेपाललाई हरसम्भव सहयोग गर्न भारत सरकार तत्पर रहेको दूतावासले जनाएको छ ।