काठमाडौँ, १५ असोज । दुई दिन परेको अविरल वर्षाका कारण काभ्रे जिल्लामा ज्यान गुमाउनेको सङ्ख्या हालसम्म ६५ पुगेको छ ।

जिल्ला प्रहरी कार्यालय काभ्रेले मङ्गलवार दिउँसो सार्वजनिक गरेको विवरणअनुसार हालसम्म एक विदेशी नागरिकसहित ६५ जनाको निधन भएको हो भने पहिरो, बाढी र डुबान लगायतका विपद्मा परेर अझै आठ व्यक्तिहरू बेपत्ता छन् ।

मृतकमध्ये ६४ जनाको कानुनी प्रक्रिया पुरा गरेर अन्तिम संस्कारको लागि परिवारको जिम्मा लगाइएको छ ।

विपद्का कारण घाइते हुनेको सङ्ख्या ७१ पुगेको प्रहरीले जनाएको छ । घाइतेमध्ये ४७ जनालाई डिस्चार्ज गरिएको छ भने २४ जनाको विभिन्न अस्पतालमा उपचार भइरहेको छ ।

असोज १३, १४ र आज (१५ गते) तीन दिनको अवधिमा नेपाली सेना र निजी हेलिकप्टरबाट ७४५ व्यक्तिको उद्धार गरिएको छ ।

सैनिक जनसम्पर्क तथा सूचना निर्देशनालय, जङ्गी अड्डाका अनुसार नेपाली सेनाको हेलिकप्टरले १३ गते १४२ जना, १४ गते ३७६ जना र आज १२७ गरेर कूल ६४५ जनाको उद्धार गरेको हो ।

अन्य निजी हेलिकप्टरबाट १०० जनाको उद्धार गरिएको काभ्रे प्रहरीले जनाएको छ ।

नेपाल प्रहरी, सशस्त्र प्रहरी लगायत अन्य निकायबाट सडक मार्ग हुँदै तीन हजार २९९ जनाको उद्धार गरिएको बताइएको छ ।