काठमाडौँ, १३ असोज । असोज १० गतेदेखि परेको वर्षाका कारण आएको बाढी र पहिरोमा मृत्यु हुनेको सङ्ख्या १७० पुगेको छ ।
गृह मन्त्रालयका अनुसार आइतबार राति ७: ३० बजेसम्मको अपडेट अनुसार १७० जनाको मृत्यु भएको हो । अद्यावधिक विवरणअनुसार, ५० जना अझै बेपत्ता छन् । बाढी पहिरोबाट उद्धार गरिएका १०७ जना घाइते रहेको मन्त्रालयले जनाएको छ ।
त्यस्तै आइतबार काभ्रे, सिन्धुली, ललितपुरलगायतका जिल्लाबाट १६२ जनाको नेपाली सेनाले हेलिकप्टरबाट उद्धार गरेको जनाएको छ ।
काठमाडौँ प्रवेश गर्ने मुख्य नाका नागढुंगानजिकै रहेको झ्याप्लेखोलामा मात्रै ३५ वटा शव गाडीसँगै पुरिएको अवस्थामा फेला परेका छन् ।
