काठमाडौं, २४ भाद्र । नेपाल पत्रकार महासंघका अध्यक्ष विपुल पोखरेलले पदबाट राजीनामा दिएका छन् । पोखरेलले वरिष्ठ उपाध्यक्ष रमेश विष्टलाई राजीनामा बुझाएका हुन् ।
महासंघको निर्वाचन दुई पटक तोकिएपनि हुन नसकेको अवस्थामा अध्यक्ष पोखरेलले पुनः कार्यतालिका ल्याउन नसकेको, सदस्यता विवाद मिलाउन नसकेको अवस्थामा उनले राजीनामा दिएका हुन् ।
पोखरेलले महासंघको अहिलेको अवस्थाप्रति नैतिक जिम्मेवारी लिदै राजीनामा दिएको उल्लेख गरेका छन् ।
२०७७ साल चैतमा भएको नेपाल पत्रकार महासंघको २६ औँ महाधिवेशनमा विपुल पोखरेल ६९४२ मतका साथ विजयी भएका थिए । उक्त महाधिवेशनमा देशभर रहेका १३ हजार भन्दा बढी पत्रकारहरू मतदानमा सहभागी भएका थिए ।
