काठमाडौँ, १८ भाद्र । काठमाडौँ महानगरका मेयर बालेन्द्र शाहले दुई दिनअघि फेसबुकमा पोस्ट गरेको स्ट्याटस हटाएको भन्दै सामाजिक सञ्जालमा आलोचना भएपछि सो पोस्ट फेसबुकले नै हटाएको उनको सचिवालयले स्पष्ट गरेको छ ।
बालेनले सो स्ट्याटसमा एमालेकी प्रदेश सांसद रेखा शर्माले नाबालिकालाई घरेलु हिंसा गरेको भन्दै पक्राउ गर्न प्रधानमन्त्री केपी ओलीमाथि प्रश्न गरेका थिए । तर, सो स्ट्याटस मङ्गलवार बिहान गायब भएको थियो ।
बालेनले डिलिट गरेको आरोप लागिरहेको बेला उनको सचिवालयले भने कसैले फेसबुकलाई रिपोर्ट गरिदिएपछि फेसबुकले नै उक्त पोस्ट हटाइदिएको बताएको छ ।
सचिवालयले कम्युनिटी गाइडलाइनभन्दा बाहिर गएको भनेर फेसबुकले हटाएको भन्दै बालेनका स्वकीय सचिव भूपदेव शाहले भनेका छन्- ‘कुन मर्म र हिसाबमा स्ट्याटस राख्नुभएको हो भनेर फेसबुकले बुझेन, आशावादी छौँ, फेसबुकले टेक डाउन गरेको त्यो स्ट्याटस रिकभर हुनेछ ।’
