परासी, १४ भाद्र । पूर्वी नवलपरासीको निर्माणाधीन सेफ्टी ट्याङ्कीमा निसास्सिएर तीन जनाको मृत्यु भएको छ ।
शुक्रवार पूर्वी नवलपरासीको बिनय-त्रिवेणी गाउँपालिका-७ रानिनगरस्थित भोला सिंह क्षेत्रीको घरमा नयाँ निर्माण भइरहेको सेफ्टी ट्याङ्कीमा निसास्सिएर तीन जनाको मृत्यु भएको जिल्ला प्रहरी कार्यालयले जानकारी दिएको छ ।
मृत्यु हुनेमा ३८ वर्षीय प्रकाश सिंह क्षेत्री, १९ वर्षीय गणेश बोगटी र सेफ्टी ट्याङ्की बनाउने मिस्त्री मोहम्मद राजा रहेका छन् ।
निर्माण कार्य सकिएपछि सामान निकाल्न सेफ्टी ट्याङ्कीको माथिको प्वाल भित्र पालैपालो गएका तिनै जनाको निसास्सिएर मृत्यु भएको थियो ।
तिनै जनालाई प्रहरीले बेहोस अवस्थामा उद्धार गरेर अस्पताल पठाएकोमा प्रकाशको पृथ्वीचन्द्र अस्पताल र अन्य दुई जनाको भीम अस्पताल भैरहवामा मृत्यु भएको प्रहरीले जानकारी दिएको छ ।
