सिन्धुली, ९ भाद्र । खोटाङबाट भक्तपुरतर्फ आउँदै गर्दा हिजो साँझ सुनकोसी नदीमा खसेको निजी सवारीसाधन फेला परेको छ ।
मध्य पहाडी लोकमार्गको सिन्धुली गोलान्जोर गाउँपालिका-१ कुडुलेमा खोटाङ हलेसीबाट भक्तपुर आउँदै गरेको प्र.३-०१-०२३ च ६३६६ नम्बरको इसुजु हाइलेक्स गाडी आफै अनियन्त्रित भएर शनिवार साँझ ५:३० बजे सुनकोसी नदीमा खसेको थियो ।
नदीमा खसेर बेपत्ता भएको उक्त सवारीसाधन पानी मुनी ५० मिटर गहिराइमा भेटिएको हो । आज बिहान २:०० बजे फलामको डोरी (टुचन) को सहायतामा सशस्त्र प्रहरीको गोताखोर टोलीले गाडीलाई पानीबाट बाहिर निकालेको जिल्ला प्रहरी कार्यालय सिन्धुलीका प्रवक्ता प्रहरी नायव उपरीक्षक अनिल कुमार खड्काले बताए ।
उक्त गाडीमा सवारमध्ये एक जना पौडी खेलेर बाहिर निस्कन सफल भएका छन् । प्रहरीका अनुसार गाडीमा सवार मध्ये भक्तपुर सुर्यविनायक जगाती बस्ने वर्ष-२७ को सुशान्त कक्षपति पौडी खेलेर बाहिर निस्किएका हुन् ।
उनको टाउको, कुहिनो लगायतमा चोट देखिएको छ ।
गाडी चालक भक्तपुर सुर्यविनायक नगरपालिका जगाती बस्ने अन्दाजी ३२ वर्षको अबिन बाके र गाडीमा सवार ३० वर्षको प्रनित स्यागु, ३७ वर्षका बलराम घटुवा बेपत्ता छन् ।
बेपत्ताको खोजी कार्य जारी छ ।
