झिलझिले (झापा), ४ भाद्र । घरायसी विवादको क्रममा श्रीमानले खुकुरी प्रहार गर्दा श्रीमतीको घटनास्थलमै निधन भएको छ ।
जिल्लाको शिवसताक्षि- ८ शिवालय टोल बस्ने ४७ वर्षीय ओम प्रकाश अधिकारीले घरायसी विवादमा श्रीमती ३० वर्षकी रन्जना गौतमलाई खुकुरी प्रहार गरेका थिए ।
घाँटीमा खुकुरी प्रहार गर्दा रञ्जनाको घटनास्थलमै निधन भएको जिल्ला प्रहरी कार्यालय झापाका प्रवक्ता प्रहरी नायव उपरीक्षक (डिएसपी) कृष्ण कुमार चन्दले केटिएम दैनिकलाई बताए ।
घटना आज साँझ १८:३५ बजेको हो ।
घटनास्थलमा पुगेको इलाका प्रहरी कार्यालय झिलझिलेको टोलीले अधिकारीलाई नियन्त्रणमा लिएको छ ।
हत्या गर्न प्रयोग गरियो धारिलो हतियार (खुकुरी) समेत बरामद गरिएको डिएसपी चन्दले बताए ।
यस विषयमा थप अनुसन्धान कार्य जारी रहेको प्रहरीले जनाएको छ ।
