काभ्रे, १६ श्रावण । कोठा भाडामा लिएर अनलाइन क्यासिनो चलाउने गरेको अभियोगमा प्रहरीले एक व्यक्तिलाई पक्राउ गरेको छ ।
जिल्लाको पनौती नगरपालिका-५ धनेश्वरमा रहेको शेष रमण न्यौपानेको घरमा भाडामा बस्ने व्यक्तिले अनलाइनमर्फत जुवा खेलाउने गरेको आरोपमा प्रहरीले पक्राउ गरेको हो ।
मंगलबार राती १०:०० बजे विशेष सुचनाको आधारमा प्रहरीले खानतलासी गर्दा पाँचखाल नगरपालिका- ६ घर भई पनौतीमा कोठा भाडामा लिएर बस्ने बर्ष ३० को सुजन श्रेष्ठ अनलाइन क्यासिनो चलाइरहेको अवस्थामा पक्राउ परेको काभ्रे प्रहरी प्रवक्ता डिएसपी राजकुमार श्रेष्ठले बताए ।
पक्राउ परेका श्रेष्ठले फेसबुक म्यासेन्जरबाट विदेशमा भएका नेपाली नागरीकहरुसँग सम्पर्कमा रहने र उनीहरूलाई जुवा खेल्न प्रोत्साहन गर्दै निजहरुको एकाउन्ट बनाइदिने कार्य गर्दथे ।
एकाउन्ट बनाएपछि क्यास ट्याग (क्यूआर कोठ )पठाउने र प्लेयरहरुले क्यास एपमा पठाएको पैसालाई क्यासिनो सम्बन्धी बिभिन्न गेमको एपहरुमा क्वाइन राखिदिने समेत गर्दथे ।
प्रहरी प्रारम्भिक अनुसान्धानमा उनले क्यास एप भाडामा दिएर प्रतिशतको आधारमा कमिसन समेत लिन गरेको खुलेको छ ।
पक्राउ परेका श्रेष्ठले मिल्की वे, भेगास स्वीप्स लगायतका विभिन्न एपहरूबाट जुवा खुलाउने गरेको कुरा प्रहरीसामू बयान दिएको डिएसपी राजकुमार श्रेष्ठले जनाए ।
उनीउपर जुवा तथा सट्टाबाजी सम्बन्धी कसूरमा जिल्ला अदालतबाट पाँच दिनको म्याद थप गरेर अनुसन्धान भइरहेको काभ्रे प्रहरीले जनाएको छ ।
