पोखरा, १५ श्रावण । रातको समयमा घरमा घुसेर हातहतियार देखाउँदै लुटपाट गर्ने चार जनालाई प्रहरीले नियन्त्रणमा लिएको छ ।
श्रावण ३ गते बेलुका कास्की जिल्लाको माछापुच्छ्रे गाउँपालिका-१ रुम्जा बस्ने शशीधर काफ्लेको घरमा लुटपाट भएको थियो ।
हातहतियारसहित आएको लुटेरा समूहले विभिन्न किसिमका सुनका गरगहना, मोबाइल र नगदसमेत गरी अन्दाजी रु १४ लाख आठ हजार बराबरको सामान लगेका थिए ।
यस घटनामा संलग्न भएको आरोपमा प्रहरीले चारजनालाई पक्राउ गरेर सार्वजनिक गरेको छ । पक्राउ पर्नेमा माछापुच्छ्रे गा.पा. वडा नं. ४ लाहाचोक बस्ने वर्ष ४२ को सुर्य बहादुर घर्ती क्षेत्री, वडा नं. २ भराभरी बस्ने वर्ष ५१ को खड्क बहादुर पुन मगर, पोखरा महानगरपालिका-२१ बस्ने वर्ष ५८ को लोक बहादुर राना मगर र वडा नं. ३ नदिपुर बस्ने वर्ष ३५ को राजु सुनारलाई प्रहरीले नियन्त्रणमा लिएको हो ।
पक्राउ परेका व्यक्तिहरुउपर चोरी तथा डाँका सम्बन्धी मुद्दामा कास्की जिल्ला अदालतबाट पाँच दिनको म्याद थप गरी थप अनुसन्धान प्रकिया अगाडि बढाईएको कास्की प्रहरी प्रवक्ता डिएसपी बसन्त कुमार शर्माले जानकारी दिए ।
