काठमाडौँ । सुनचाँदीका गरगहना लुटपाट गर्नकै लागि झापाको बिर्तामोड नगरपालिका–४ कालिका नगरकी ६७ बर्सिया विष्णुमाया विष्टको हत्या गरेको प्रारम्भिक अनुसन्धानबाट खुलेको छ ।
गत वैशाख २६ गते वृद्धाको मध्यरातमा आफ्नै घरभित्रै हत्या भएको थियो । खन्तीले हानेर उनको हत्या गरिएको थियो ।
घटनाको अनुसन्धानको लागि प्रहरीका चार वटा टोली खटिएका थिए । घटना भएपछि केन्द्रीय अनुसन्धान ब्युरो काठमाडौँको टोली, कोसी प्रदेश अनुसन्धान समूह, जिल्ला प्रहरी र इलाका प्रहरी कार्यालय अनारमनीका गरी चार वटा टोलीले संयुक्त अनुसन्धान गरेका थिए ।
लामो अनुसन्धानपछि जिल्ला प्रहरी कार्यालय झापाले आज पत्रकार सम्मेलन गरेर अभियुक्तहरू सार्वजनिक गरेको हो ।
सार्वजनिक गरिएका अभियुक्तमध्ये २२ वर्षका गंगा प्रसाद राजवंशी वृद्धाको हत्याका मुख्य अभियुक्त हुन् । त्यस्तै अर्का अभियुक्त महेश राजवंशीले हत्यापछि चोरी गर्न सहयोग गरेको जनाइएको छ ।
हत्यापछि मृतकले हातमा लगाएको सुनको बाला, सिक्कासहितको बेरुवा औँठी, जन्तर, सिक्री, कानमा लगाएको टप र चाँदीको कलश लिएर गंगा राजवंशी फरार भएका थिए ।
हत्यापछि लुटपाट गरिएको सुन-चाँदीका गरगहना लुकाउनको लागि सहयोग गरेको अभियोगमा २१ बर्सिया बर्षा मुनदास राजवंशीलाई प्रहरीले पक्राउ गरेको हो । त्यस्तै मृतकको सुन बेच्न सहयोग गर्ने ज्याक भन्ने भगरथ माझी र सुन खरिद गर्ने धन बहादुर कामीलाई समेत प्रहरीले पक्राउ गरेको छ ।
सबै अभियुक्तहरूलाई हिजो पक्राउ गरिएको जिल्ला प्रहरी कार्यालय झापाका प्रवक्ता प्रहरी नायव उपरीक्षक कृष्ण कुमार चन्दले केटिएम दैनिकलाई बताए ।
सिआइबी प्रवक्ता प्रहरी उपरीक्षक होबिन्द्र बोगटीका अनुसार सुन व्यापारी धन बहादुर कामीबाहेक अन्य सबै बिर्तामोड नगरपालिका-४ शिवनगर टोलका बासिन्दा हुन् । अभियुक्त २१ वर्षीया महिला गंगा प्रसाद राजवंशीको श्रीमती रहेको पत्रकार सम्मेलनमा जानकारी दिइयो ।
पक्राउ परेका पाँचै जनालाई मुलुकी अपराध संहिता, २०७४ अन्तर्गत ज्यान सम्बन्धी कसुरमा थप अनुसन्धान एवं कारवाहीको लागि जिल्ला प्रहरी कार्यालय, झापामा बुझाइएको एसपी बोगटीले जानकारी दिए ।
पत्रकार सम्मेलनमा लुटपाट भएका गरगहना समेत सार्वजनिक गरिएको थियो ।