काठमाडौँ– राष्ट्रपति रामचन्द्र पौडेलले विजयादशमीका अवसरमा बुधबार बिहान शुभसाइतमा गुरु पुरोहितबाट टीका, जमरा र आशीर्वाद ग्रहण गर्ने भएका छन्।
राष्ट्रपति कार्यालय शीतल निवासमा बिहान १० बजेर २६ मिनेटको शुभसाइतमा राष्ट्रपति पौडेलले टीका, जमरा र आशीर्वाद ग्रहण गर्ने कार्यक्रम रहेको राष्ट्रपतिका प्रेस सल्लाहकार किरण पोखरेलले जानकारी दिए।
विगतका वर्षमा राष्ट्रपतिले विजयादशमीका दिन सर्वसाधारणलाई टीका लगाइदिने परम्परा रहे पनि गत वर्षदेखि उक्त कार्यक्रम सञ्चालन गरिएको छैन। मुलुकले विषम परिस्थितिको सामना गरिरहेको र शान्तिपूर्ण तथा हर्षोल्लासपूर्ण वातावरण नरहेकाले सर्वसाधारणलाई टीका लगाइदिने कार्यक्रम नराखिएको हो।
