मुस्ताङ । पोखरा–जोमसोम नियमित हवाई सेवा स्थगित भएको छ। यस रुटमा उडान सञ्चालन गर्दै आएका निजी वायुसेवा कम्पनीले पर्यटकीय याम नसकिँदै यस वर्ष नियमित उडान बन्द गरेका हुन्।
मुस्ताङमा बर्सेनि दुई याममा तारा एयर र समिट एयरका १८ सिट क्षमताका जहाजमार्फत पोखरा–जोमसोम हवाई सेवा सञ्चालन हुँदै आएको थियो।
जोमसोमस्थित नागरिक उड्डयन कार्यालयका प्रमुख विश्वराज शर्माका अनुसार तारा एयरले अघिल्लो सातादेखि र समिट एयरले सोमबारदेखि नियमित उडान सेवा स्थगित गरेका हुन्।
सामान्यतया मुस्ताङमा अगस्टदेखि नोभेम्बरसम्म पोखरा–जोमसोम हवाई सेवा नियमित सञ्चालन हुने गरेको थियो। तर, यस वर्ष निर्धारित याम पूरा नहुँदै उडान रोकिएको हो।
प्रमुख शर्माका अनुसार तारा एयरका तीनवटा जहाजमध्ये एउटा मर्मत भइरहेको छ भने समिट एयरका चारवटा जहाजमध्ये एउटा मर्मतका लागि लैजाने तयारी गरिएको छ।
समिट एयरका जोमसोमस्थित स्टेशन इन्चार्ज सुमन थकालीले रसुवामा भएको विनाशकारी बाढी तथा देशका विभिन्न स्थानमा बाढीपहिरोका कारण सडकमार्ग अवरुद्ध हुँदा यात्रुहरूको बुकिङ रद्द भएको बताउनुभयो। यात्रुको सङ्ख्या घटेपछि नियमित उडान स्थगित गर्नुपरेको उहाँको भनाइ छ।
यद्यपि, नियमित उडान स्थगित भए पनि चार्टर उडान भने सञ्चालन भइरहने थकालीले जानकारी दिनुभयो।
तारा एयर र समिट एयरले यस रुटमा बर्सेनि एक हजार दुई सयभन्दा बढी नियमित उडान गर्दै आएका छन्। नियमित सेवा स्थगित हुँदा मुस्ताङ आवतजावत गर्ने पर्यटक तथा अन्य यात्रु प्रभावित हुने भएका छन्।
