काठमाडौँ । सरकारले गहुँको न्यूनतम समर्थन मूल्य प्रतिक्विन्टल ४ हजार १०७ रुपैयाँ निर्धारण गरेको छ।
शुक्रबार बसेको मन्त्रिपरिषद् बैठकले चालु सिजनका लागि गहुँको न्यूनतम समर्थन मूल्य तोक्ने निर्णय गरेको सूचना तथा सञ्चारमन्त्री विक्रम तिमिल्सिनाले जानकारी दिए।
बैठकले बुढीगण्डकीमा आएको बाढीबाट प्रभावित गोरखाका चुमनुव्री, धार्चे र आरुघाट गाउँपालिकालाई विपद् सङ्कटग्रस्त क्षेत्र घोषणा गर्ने निर्णयसमेत गरेको छ। त्यस्तै, धादिङको त्रिपुरासुन्दरी गाउँपालिकाका वडा नम्बर १ र २ लाई पनि सङ्कटग्रस्त क्षेत्र घोषणा गरिएको छ।
यसैगरी, बाढीपहिरोबाट प्रभावित बागलुङका गलकोट नगरपालिका र ढोरपाटन नगरपालिकालाई समेत विपद् सङ्कटग्रस्त क्षेत्र घोषणा गर्ने निर्णय मन्त्रिपरिषद् बैठकले गरेको छ।
