काठमाडौं। प्रहरी महानिरीक्षक दानबहादुर कार्कीले नेपाल प्रहरीको वास्तविक शक्ति कानुनी अधिकारमा मात्र नभई नागरिकले गर्ने विश्वासमा निहित रहेको बताएका छन्। उनले प्रहरीलाई निष्पक्ष, पारदर्शी, प्रविधिमैत्री र नागरिकप्रति उत्तरदायी बनाउनुपर्नेमा जोड दिएका छन्।
सोमबार प्रहरी निरीक्षक आधारभूत तालिमको १८४औँ समूहको दीक्षान्त समारोहलाई सम्बोधन गर्दै कार्कीले साइबर अपराध, अन्तरदेशीय अपराध र विपद् व्यवस्थापनजस्ता चुनौती सामना गर्न प्रहरीको कार्यशैलीमा परिवर्तन आवश्यक रहेको बताए।
उनले सूचना प्रविधि र कृत्रिम बुद्धिमत्ता (एआई) को प्रयोग गर्दा मानवअधिकार, कानुनी प्रक्रिया र व्यावसायिक विवेकलाई केन्द्रमा राख्नुपर्ने उल्लेख गरे। बाह्य प्रभाव, व्यक्तिगत आग्रह र अनुचित दबाबबाट मुक्त भएर कानुन कार्यान्वयन गर्न पनि उनले प्रहरी कर्मचारीलाई निर्देशन दिए।
कार्कीले कानुन कार्यान्वयन कानुनी प्रक्रियामा सीमित नराखी व्यवहारमा समेत निष्पक्ष, सम्मानजनक र जवाफदेही हुनुपर्ने बताए। विशेषगरी महिला, बालबालिका, ज्येष्ठ नागरिक र अपाङ्गता भएका व्यक्तिसँग सम्बन्धित घटनामा संवेदनशीलता, गोपनीयता र पीडितकेन्द्रित दृष्टिकोण अपनाउन उनले आग्रह गरे।
‘प्रहरीको शक्ति कानूनले प्रदान गरेको अधिकारमा मात्र होइन, नागरिकले गर्ने विश्वासमा पनि निहित हुन्छ,’ कार्कीले भने।
उनले नागरिकले प्रहरीको निर्णयमा असहमति जनाए पनि प्रहरीको व्यवहार र कार्यसम्पादनप्रति निष्पक्षताको विश्वास कायम रहने वातावरण बनाउनुपर्नेमा जोड दिए।
