गाजा। गाजापट्टीका विभिन्न क्षेत्रमा शनिबार इजरायली सेनाले गरेको ड्रोन र हवाई आक्रमणमा सात प्यालेस्टाइनीको मृत्यु भएको छ। मृतकमा आठ वर्षीया बालिका पनि छन्। सर्वसाधारणको भीडभाड हुने क्षेत्र र विस्थापित परिवारका आश्रयस्थलसमेत आक्रमणको निशानामा परेका छन्।
गाजा सहरको पश्चिमी क्षेत्रमा ड्रोनबाट प्रहार गरिएको मिसाइल लागेर चार जनाको मृत्यु भएको छ। स्थानीय स्रोतका अनुसार उक्त क्षेत्रमा रेस्टुरेन्ट, पसल र विस्थापितहरूका आश्रयस्थल थिए। आक्रमणमा घाइते भएका छ जनाको अल–शिफा मेडिकल कम्प्लेक्समा उपचार भइरहेको छ। उनीहरूमध्ये केहीको अवस्था गम्भीर छ।
गाजा सहरको उत्तरपूर्वमा मस्जिदनजिकै भएको अर्को हवाई आक्रमणमा ४४ वर्षीय मोहम्मद वालिद अल–नखालाको मृत्यु भएको छ। त्यस्तै, परिवारसँग टेन्टमा बसिरहेकी आठ वर्षीया शाहद अब्दुल–रज्जाक अल–नज्जरको इजरायली ड्रोनबाट प्रहार गरिएको मिसाइल लागेर ज्यान गएको छ।
दक्षिण गाजाको खान युनिसस्थित नासेर मेडिकल कम्प्लेक्सका अनुसार अल–मावासी क्षेत्रमा शुक्रबार भएको गोलाबारीमा घाइते मौसा अबु दानको उपचारका क्रममा मृत्यु भएको छ।
गाजाका स्वास्थ्य अधिकारीहरूका अनुसार सन् २०२५ अक्टोबरमा हमास र इजरायलबीच युद्धविराम भएयता इजरायली आक्रमणमा १ हजार ४ सय ८१ प्यालेस्टाइनीको मृत्यु भइसकेको छ। सन् २०२३ अक्टोबर ७ मा द्वन्द्व सुरु भएयता गाजामा ज्यान गुमाउने प्यालेस्टाइनीको कुल संख्या ७४ हजार ३ सय ७० पुगेको अधिकारीहरूको तथ्यांक छ।
युद्धविरामपछि पनि आक्रमण र मानवीय क्षति जारी रहँदा गाजाको मानवीय संकट थप गहिरिँदै गएको छ।
