चितवन । माडी नगरपालिकाले आगामी मङ्सिर १ गतेदेखि ‘मासु जाँच ऐन, २०५५’ पूर्ण रूपमा कार्यान्वयनमा ल्याउने भएको छ । सरोकारवालासँग छलफलपछि नगरपालिकाले ऐन कार्यान्वयनको मिति तय गरेको हो ।
ऐन कार्यान्वयनसँगै नगरपालिकाभित्र रहेका बधस्थलको नक्साङ्कन गरिनेछ । तोकिएको मापदण्ड पूरा गरेका बधस्थल अनिवार्य रूपमा दर्ता गरी मात्र सञ्चालन गर्नुपर्ने व्यवस्था गरिने नगरपालिकाले जनाएको छ ।
नगरप्रमुख ताराकुमारी काजी महतोले स्वच्छ, स्वस्थ र गुणस्तरीय मासुको बिक्रीवितरण सुनिश्चित गर्न ऐन कार्यान्वयनमा ल्याउन लागिएको बताउनुभयो । बजारमा मासुको गुणस्तर र सरसफाइ कायम गर्न संयुक्त अनुगमन टोली गठन गरी नियमित अनुगमन गरिने उहाँले जानकारी दिनुभयो ।
पशु सेवा कार्यालय चितवनका प्रमुख डा. प्रभात न्यौपानेले ऐन कार्यान्वयन भएपछि स्वच्छ र स्वस्थ मासु मात्रै बिक्री गर्न पाइने बताउनुभयो । उहाँका अनुसार छालाविहीन मासु बिक्री गर्नुपर्नेछ भने रोगका कारण मरेका पशुबाट मासु उत्पादन गरी बिक्री गर्न पाइने छैन ।
उहाँले बधस्थल र मासु बिक्री कक्ष अलग-अलग हुनुपर्ने तथा मासु सुरक्षित राख्न आवश्यक तापक्रम अर्थात् ‘कोल्ड चेन’ कायम गर्नुपर्ने बताउनुभयो ।
चितवनका अन्य स्थानीय तहमा पनि ‘मासु जाँच ऐन, २०५५’ कार्यान्वयन गर्न दबाब बढेको छ । जिल्लाका अधिकांश स्थानमा बधस्थल व्यवस्थित नहुँदा मासुको स्वच्छता र गुणस्तरमा प्रश्न उठ्दै आएको छ ।
