तनहुँ– तनहुँको ऋषिङ गाउँपालिका–१ मा निर्माणाधीन १४० मेगावाट क्षमताको तनहुँ जलविद्युत् आयोजनाअन्तर्गत दमौली–भरतपुर २२० केभी डबल सर्किट प्रसारण लाइन निर्माणले गति लिएको छ। प्रसारण लाइनको हालसम्म करिब ८२ प्रतिशत काम सम्पन्न भएको आयोजनाले जनाएको छ।
३५ किलोमिटर लामो प्रसारण लाइनमा निर्माण गर्नुपर्ने ९४ वटा टावरमध्ये ८३ वटाको जग निर्माण सम्पन्न भइसकेको छ भने ८० वटा टावर खडा गरिसकिएको आयोजना प्रमुख श्यामजी भण्डारीले जानकारी दिए।
चितवन र तनहुँका डिभिजन वन कार्यालयबाट वन क्षेत्रमा प्रवेश तथा रुख कटानका लागि आवश्यक अनुमति प्राप्त भएपछि प्रसारण लाइन निर्माणले थप गति लिएको भण्डारीले बताए।
हाल प्रसारण लाइनअन्तर्गत टावरको जग निर्माण, टावर खडा गर्ने, आवश्यक स्थानमा टावर संरक्षण गर्ने र तार तान्ने काम एकसाथ भइरहेको छ। चितवनको भरतपुर महानगरपालिका तथा तनहुँको देवघाट गाउँपालिका क्षेत्रमा तार तान्ने काम जारी रहेको छ। हालसम्म करिब दुई किलोमिटर तार तानिसकिएको भण्डारीले बताए।
प्रसारण लाइन निर्माणको ठेक्का चरण–३ अन्तर्गत भारतको केइसी इन्टरनेशनलले पाएको छ। तनहुँ जलविद्युत् आयोजनाबाट उत्पादन हुने विद्युत् राष्ट्रिय प्रसारण प्रणालीमा जोड्नका लागि दमौली–भरतपुर प्रसारण लाइन निर्माण भइरहेको हो।
वन क्षेत्रमा प्रवेश र रुख कटानको अनुमति प्राप्त भएपछि यसअघि रोकिएका तथा प्रभावित काम अघि बढाउन सहज भएको आयोजनाले जनाएको छ। अहिले विभिन्न स्थानमा टावर निर्माण, टावर खडा गर्ने र तार तान्ने कामलाई समानान्तर रूपमा अघि बढाइएको छ।
१४० मेगावाट क्षमताको तनहुँ जलविद्युत् आयोजनाबाट उत्पादन हुने विद्युत् राष्ट्रिय प्रसारण प्रणालीमा जोड्न आवश्यक प्रसारण पूर्वाधार निर्माणलाई आयोजनाले प्राथमिकतामा राखेको छ। दमौली–भरतपुर २२० केभी प्रसारण लाइन आयोजनाको विद्युत् राष्ट्रिय प्रणालीमा जोड्ने महत्वपूर्ण पूर्वाधारका रूपमा रहेको छ।
