काठमाडौं । पृथ्वी राजमार्गअन्तर्गत धादिङ खण्डमा शनिबार पाँच घण्टा सवारी आवागमन पूर्ण रूपमा बन्द हुने भएको छ ।
भोटेकोशीमा आएको बाढीका कारण गजुरी गाउँपालिका–२ फुर्केखालास्थित पुल बगाएपछि वैकल्पिक मार्गका रूपमा प्रयोग हुँदै आएको सडकमा मर्मतसम्भार गर्नुपर्ने भएकाले शनिबार बिहान १० बजेदेखि दिउँसो ३ बजेसम्म यातायात सञ्चालनमा रोक लगाइने भएको हो ।
हाल वैकल्पिक मार्गका रूपमा परेवाटार–पिपलटार–आदमटार–बेलिनटार हुँदै मास्टारसम्मको सडक प्रयोग हुँदै आएको छ । उक्त सडकका विभिन्न स्थानमा थप मर्मतसम्भार आवश्यक भएकाले केही समय सवारी आवागमन बन्द गर्न लागिएको जिल्ला प्रशासन कार्यालय धादिङले जनाएको छ ।
प्रशासनले बन्द अवधिमा यात्रु तथा सवारी चालकलाई धादिङबेँसी–सुनौला बजार–भोर्ले–कोसिखोला–फोस्रेटार–कल्लेरीटार लगायतका अन्य वैकल्पिक मार्ग प्रयोग गर्न अनुरोध गरेको छ ।
