रसुवा । भोटेकोशी बाढीबाट प्रभावित बालबालिकाको संरक्षण तथा मनोसामाजिक विकासका लागि रसुवाका विभिन्न स्थानमा १३ वटा बालमैत्री केन्द्र स्थापना गरिएको छ ।
नेपाल रेडक्रस सोसाइटीले युनिसेफको सहयोगमा ती केन्द्र स्थापना गरी सञ्चालन तथा सहजीकरण गर्दै आएको हो । विपद्का कारण प्रभावित बालबालिकालाई सुरक्षित, सहज र बालमैत्री वातावरण उपलब्ध गराउने उद्देश्यले केन्द्र सञ्चालनमा ल्याइएको नेपाल रेडक्रस सोसाइटी रसुवा शाखाले जनाएको छ ।
स्थापना गरिएका १३ केन्द्रमध्ये नौ वटा पूर्ण रूपमा सञ्चालनमा आइसकेका छन् भने बाँकी चार वटा सञ्चालनको तयारीमा छन् । हाल सञ्चालनमा रहेका केन्द्रबाट ४६२ जना बालबालिका लाभान्वित भइरहेका छन् ।
केन्द्रमा बालबालिकाको उमेर र आवश्यकताअनुसार खेलकुद, मनोरञ्जन, सिकाइ, सिर्जनात्मक गतिविधि तथा मनोसामाजिक सहयोगसम्बन्धी कार्यक्रम सञ्चालन भइरहेका छन् । यस्ता गतिविधिले विपद्पछिको कठिन परिस्थितिमा बालबालिकालाई आफ्ना भावना व्यक्त गर्न, साथीहरूसँग घुलमिल हुन तथा सकारात्मक र रचनात्मक गतिविधिमा सहभागी हुन सहयोग पुगेको जनाइएको छ ।
हाल केन्द्रमा २१९ जना बालक र २४३ जना बालिका रहेका छन् । उमेर समूहअनुसार पाँच वर्षभन्दा कम उमेरका ८८ जना र पाँच वर्षभन्दा माथिका ३७४ जना बालबालिका छन् । केन्द्रमा सहभागी बालबालिकामध्ये एक जना अपाङ्गता भएका रहेको नेपाल रेडक्रस सोसाइटी रसुवा शाखाले जनाएको छ।
