काठमाडौँ– बाढी प्रभावित क्षेत्रमा हैजा नियन्त्रणका लागि मुखबाट दिइने हैजाविरुद्धको खोप (ओरल कोलेरा भ्याक्सिन–ओसिभी) अभियान तीव्र पारिएको छ।
स्वास्थ्य सेवा विभागअन्तर्गत परिवार कल्याण महाशाखाले सार्वजनिक गरेको ‘बाढी प्रभावित क्षेत्रमा नियमित खोप सेवा तथा खोपबाट रोकथाम गर्न सकिने रोगहरूको निगरानी’ सम्बन्धी पछिल्लो प्रतिवेदनअनुसार रसुवा र नुवाकोटका बाढी प्रभावित क्षेत्रमा ५९ हजार ७३२ जनाले ओसिभी खोप लगाएका छन्।
प्रतिवेदनअनुसार रसुवामा १५ हजार ८१२ र नुवाकोटमा ४३ हजार ९२० जनाले ओसिभी खोप पाएका हुन्। रसुवाका गोसाइँकुण्ड, उत्तरगया, आमाछोदिङ्मो र कालिका गाउँपालिकामा तथा नुवाकोटको विदुर, बेलकोटगढी, किस्पाङ र तारकेश्वर गाउँपालिकामा खोप अभियान सञ्चालन भइरहेको छ।
बाढी प्रभावित क्षेत्रमा टिटानस–डिफ्थेरिया (टिडी) खोप अभियानसमेत सञ्चालन भइरहेको छ। स्वास्थ्यकर्मी, उद्धारकर्मी तथा घाइतेलाई लक्षित गरी सञ्चालन गरिएको अभियानअन्तर्गत रसुवाका चार स्थानीय तहमा ८२१ जनाले र नुवाकोटको विदुर नगरपालिकामा ११३ जनाले टिडी खोप लगाएका छन्।
प्रतिवेदनअनुसार बाढीपछि दादुराको आशङ्कामा आठवटा नमुना परीक्षणका लागि पठाइएकामा सातवटाको नतिजा नेगेटिभ आएको छ। एउटा नमुनाको नतिजा आउन बाँकी छ। परीक्षण गरिएका नमुनामध्ये रसुवाका ६ र नुवाकोटका २ वटा छन्।
परिवार कल्याण महाशाखाअन्तर्गत बाल स्वास्थ्य तथा खोप शाखाका प्रमुख डा. अभियान गौतमले बाढी प्रभावित क्षेत्रमा नियमित खोप सेवा, रोग निगरानी र हैजा नियन्त्रण अभियानलाई एकसाथ अघि बढाइएको बताए।
उनका अनुसार रसुवा र नुवाकोटमा दादुराविरुद्धको ‘एमआर’ खोप अभियान सञ्चालनका लागि तयारी सुरु गरिएको छ। त्यस्तै, धादिङ, गोरखा र तनहुँका बाँकी प्रभावित वडामा ओसिभी खोप अभियान सञ्चालन गर्ने तयारी भइरहेको छ।
