काठमाडौं। सभामुख डोलप्रसाद अर्यालले रोजगारी सिर्जना, लगानी विस्तार र आर्थिक अवसर बढाउन राज्यको नीति तथा विकासको मोडलमै पुनर्विचार गर्नुपर्ने बताएका छन्।
बिहीबार काठमाडौंमा आयोजित कार्यक्रममा उनले आधारभूत आवश्यकता पूरा गर्नकै लागि नेपाली विदेश जानुपर्ने अवस्था अन्त्य गर्न स्वदेशमै रोजगारी र अवसर सिर्जना गर्नुपर्ने बताए। वैदेशिक रोजगारीलाई विदेश जाने नागरिकको संख्याका रूपमा मात्र नभई नेपालभित्र पर्याप्त अवसर सिर्जना हुन नसकेको परिणामका रूपमा हेर्नुपर्ने उनको भनाइ छ।
निजी क्षेत्रलाई लगानीका लागि प्रोत्साहित गर्न नीतिगत स्पष्टता र राज्यको प्रभावकारी भूमिका आवश्यक रहेको उनले बताए। नेपाललाई प्राकृतिक स्रोत र सौन्दर्यमा मात्र सीमित नराखी उत्पादन, रोजगारी, लगानी, अध्ययन तथा अनुसन्धानको केन्द्रका रूपमा विकास गर्नुपर्ने उनको भनाइ छ।
नेपालका सम्भावनालाई रोजगारी र आर्थिक अवसरमा रूपान्तरण गर्न नसक्दा युवा तथा श्रमशक्ति विदेशिने क्रम रोक्न कठिन हुने उल्लेख गर्दै अर्यालले सरकारको प्राथमिकता उत्पादन र रोजगारी विस्तार हुने गरी नीति निर्माणमा केन्द्रित हुनुपर्ने बताए।
आफू करिब ३० वर्षदेखि नेपालीलाई बाध्यतावश विदेश जानुपर्ने अवस्थाबाट मुक्त गर्ने उद्देश्यले काम गर्दै आएको उल्लेख गर्दै उनले भने, ‘श्रीमतीको सारी किन्न, बालबालिकाको स्कुल शुल्क तिर्न वा परिवारका सदस्यको उपचार गर्नकै लागि विदेश जानुपर्ने बाध्यताको अन्त्य हुनुपर्छ।’
राज्यले नागरिकका आधारभूत आवश्यकता पूरा गर्ने वातावरण बनाउन नसकेको प्रश्नले आफूलाई राजनीतिमा प्रवेश गराएको पनि अर्यालले बताए। नेपाललाई नेपालीका लागि मात्र नभई विश्वभरका मानिस आएर बस्न, काम गर्न र अवसर सिर्जना गर्न सक्ने मुलुकका रूपमा विकास गर्ने आफ्नो उद्देश्य रहेको उनले बताए।
