काठमाडौं। अर्थमन्त्री डा. स्वर्णिम वाग्लेले गाँजाको व्यावसायिक उत्पादन र औषधिजन्य प्रयोगका लागि आवश्यक कानुनी व्यवस्था गर्न सरकार सकारात्मक रहेको बताएका छन्। उनले यस विषयमा गृह मन्त्रालयसँग समन्वय गरी प्रक्रिया अघि बढाउने प्रतिबद्धता जनाएका छन्।
शुक्रबार राष्ट्रिय सभा बैठकमा सांसदहरूले उठाएका प्रश्नको जवाफ दिँदै वाग्लेले गाँजा खेतीलाई व्यवस्थित गर्न आवश्यक कानुन निर्माणका लागि विज्ञहरूको अध्ययन र निष्कर्षलाई आधार बनाउनुपर्ने बताए। कानुनी व्यवस्था भए अर्थ मन्त्रालयले सहजीकरण गर्ने उनको भनाइ छ।
‘गृह मन्त्री र गृह मन्त्रालयसँग समन्वय गरी यसलाई प्राथमिकताका साथ अगाडि बढाउने आश्वासन दिन चाहन्छु,’ उनले भने।
वाग्लेले गाँजाको उत्पादन र बजारीकरणलाई आय, रोजगारी र राजस्व वृद्धिसँग मात्र जोडेर हेर्न नहुने बताए। यसको औषधीय उपयोग र नियन्त्रित प्रयोगको सम्भावनासमेत अध्ययन गर्नुपर्ने उनको भनाइ थियो।
गाँजा खेतीसम्बन्धी विषय मुख्यतः गृह मन्त्रालयको कार्यक्षेत्रमा पर्ने उल्लेख गर्दै उनले थप अध्ययन र कानुनी निक्र्यौलका लागि गृहसँग समन्वय गर्ने बताए। औद्योगिक प्रवर्द्धन र सरकारी राजस्व वृद्धिका दृष्टिले गाँजा खेतीको सम्भावनालाई अर्थ मन्त्रालयले प्राथमिकतामा राख्ने उनले बताए।
विगतका बजेटमा समेत गाँजाको सम्भाव्यता अध्ययन गर्ने विषय समेटिएको स्मरण गर्दै वाग्लेले यसको व्यावसायिक तथा औषधिजन्य उपयोगबारे सार्वजनिक बहस भइरहेको बताए। गाँजामाथिको प्रतिबन्ध र पछिल्लो समय विभिन्न देशमा देखिएको नीतिगत परिवर्तनको सन्दर्भमा नेपालले पनि यस विषयलाई सकारात्मक रूपमा अघि बढाउनुपर्ने उनको भनाइ थियो।
‘नेपालले पनि यसलाई सकारात्मक रूपमा अगाडि बढाउनु आवश्यक छ,’ उनले भने।
गाँजा खेतीलाई कानुनी रूपमा व्यवस्थित गर्ने विषयलाई तदारुकताका साथ निष्कर्षमा पुर्याउन आफूले पहल गर्ने वाग्लेले बताए।
