यमन। यमनमा हुथी विद्रोही समूहले गरेको मिसाइल र ड्रोन आक्रमणमा बिहीबार कम्तीमा ३८ सरकारी सैनिकको मृत्यु भएको छ भने २९ जना घाइते भएका छन्। चिकित्सा स्रोतहरूका अनुसार यो पछिल्ला केही वर्षयताकै सबैभन्दा घातक आक्रमणमध्ये एक हो।
एक सैन्य अधिकारीका अनुसार मध्य यमनको मरिब प्रान्तस्थित अल–रुवाइक सैन्य शिविर तथा साउदी अरेबसँगको सीमावर्ती हद्रमाउतका अल–अब्र र अल–वदियाह क्षेत्रमा रहेका सैन्य शिविरहरूलाई लक्षित गरी आक्रमण गरिएको हो।
नाम नखुलाउने सर्तमा एक सुरक्षा स्रोतले एएफपीसँग भने, “मरिबस्थित शिविरमा बिहान सैनिकहरू तयारीमा रहेका बेला मिसाइल प्रहार गरिएको थियो। उक्त आक्रमणमा कम्तीमा ३८ सरकारी सैनिकसहित ४५ जनाको मृत्यु भएको छ भने अन्य केही घाइते भएका छन्।”
एक दशकभन्दा लामो गृहयुद्धमा फसेको यमन पछिल्लो समय अमेरिका–इरान तनावको प्रभावमा पनि परेको छ। तेहरान समर्थित हुथी विद्रोहीहरूले साउदी समर्थित सरकारसँग सन् २०२२ मा भएको युद्धविराम उल्लङ्घन गरेपछि द्वन्द्व फेरि चर्किएको हो।
हुथीहरूले राजधानी सानाका लागि इरानी विमानको सिधा उडानलाई स्वागत गरेपछि दुवै पक्षबीच आक्रमण–प्रत्याक्रमण सुरु भएको थियो। त्यसपछि विद्रोहीहरूले साउदी अरबमाथि समुद्री नाकाबन्दी घोषणा गर्दै उसका तेल ट्याङ्करहरूलाई पनि निशाना बनाउन थालेका छन्।
गत महिना पनि हुथीहरूले होदइदा बन्दरगाह शहरको दक्षिण क्षेत्रमा सरकारी फौजमाथि आक्रमण गर्दा १६ सैनिक मारिएका थिए।
सन् २०१४ देखि जारी द्वन्द्वमा हुथी विद्रोहीहरूले राजधानी साना र उत्तर यमनका अधिकांश क्षेत्र आफ्नो नियन्त्रणमा राखेका छन् भने अन्तर्राष्ट्रिय मान्यता प्राप्त सरकारले दक्षिणी भूभागको ठूलो हिस्सा नियन्त्रण गर्दै आएको छ। संयुक्त राष्ट्रसंघको पहलमा सन् २०२२ मा भएको युद्धविरामको औपचारिक अवधि समाप्त भए पनि लामो समयसम्म तुलनात्मक रूपमा शान्ति कायम रहेको थियो।
