काठमाडौँ। धार्मिक तथा जातीय सहिष्णुता कायम गर्दै शान्ति, सद्भाव र सामाजिक एकताको सन्देश प्रवाह गर्न नागरिक समाजले शनिबार काठमाडौंमा ‘सद्भाव र्याली’ आयोजना गरेको छ।
वृहत नागरिक आन्दोलनको अगुवाइमा आयोजित र्यालीमार्फत सहभागीहरूले समाजमा द्वेष र विभाजन फैलाउने गतिविधिविरुद्ध एकजुट हुन तथा संवाद, सहिष्णुता र सामाजिक सद्भावलाई सुदृढ बनाउन आग्रह गरेका हुन्।
गत साउन १० गते सुनसरीको कप्तानगञ्जमा दुई समुदायबीच भएको झडपमा दुई जनाको मृत्यु भएको थियो। त्यसपछि सिरहामा भएको विवादका क्रममा प्रहरीको गोली लागेर एक जनाको मृत्यु भएपछि तराईका केही जिल्लामा तनाव बढेको थियो। ती घटनापछि केही क्षेत्रमा निषेधाज्ञा कायमै रहेकाले सामाजिक सद्भाव कायम गर्न सबै पक्ष संयमित हुनुपर्नेमा र्यालीका सहभागीले जोड दिएका छन्।
र्यालीमा सहभागीहरूले धार्मिक तथा जातीय विविधतालाई नेपालको साझा शक्तिका रूपमा संरक्षण गर्दै शान्तिपूर्ण सहअस्तित्व र आपसी विश्वास सुदृढ बनाउन सबै पक्ष जिम्मेवार बन्नुपर्ने धारणा राखेका थिए।
