भद्रपुर ।अन्तर्राष्ट्रिय बजारमा नेपाली अलैँचीको माग बढ्दै गएसँगै काँकडभिट्टा नाकाबाट हुने अलैँची निर्यातमा उल्लेखनीय वृद्धि भएको छ। गत आर्थिक वर्ष २०८२/८३ मा यस नाकाबाट रु १२ अर्ब ६३ करोड ६९ लाख ७० हजार बराबरको अलैँची निर्यात भएको छ।
काँकडभिट्टा भन्सार कार्यालयका अनुसार अघिल्लो आर्थिक वर्ष २०८१/८२ मा रु सात अर्ब ६७ करोड ४० लाख ३७ हजार बराबरको अलैँची निर्यात भएको थियो। यस आधारमा एक वर्षमै निर्यात कारोबार रु चार अर्ब ९६ करोड २९ लाख ३३ हजार ले बढेको हो, जुन करिब ६४.६५ प्रतिशत वृद्धि हो।
निर्यातको परिमाणमा पनि उल्लेखनीय वृद्धि भएको छ। गत आर्थिक वर्षमा काँकडभिट्टा नाकाबाट ६३ लाख ८५ हजार ८७० किलोग्राम अलैँची निर्यात भएको छ। अघिल्लो आर्थिक वर्षमा भने ४२ लाख ९४ हजार ५५० किलोग्राम मात्रै अलैँची निर्यात भएको थियो।
काँकडभिट्टा भन्सार कार्यालयका सूचना अधिकारी तथा भन्सार अधिकृत माङ्कल राई का अनुसार अन्तर्राष्ट्रिय बजारमा नेपाली अलैँचीको बढ्दो मागले निर्यात कारोबारमा सकारात्मक प्रभाव परेको हो।
पूर्वी पहाडी जिल्लामा मुख्य रूपमा उत्पादन हुने अलैँची नेपालको प्रमुख नगदे बालीमध्ये एक हो। यसको निर्यातले किसानको आम्दानी बढाउनुका साथै मुलुकको विदेशी मुद्रा आर्जनमा समेत महत्वपूर्ण योगदान पुर्याउँदै आएको छ।
भन्सार अधिकृत राईका अनुसार उत्पादन वृद्धि, गुणस्तर सुधार र नयाँ बजार विस्तारमा ध्यान दिन सके आगामी वर्षहरूमा अलैँची निर्यात अझै उल्लेखनीय रूपमा बढ्ने सम्भावना रहेको छ।
