काठमाडौँ । समस्याग्रस्त सहकारी व्यवस्थापन समितिले दुई समस्याग्रस्त सहकारी संस्थाका १२५ जना साना बचतकर्तालाई बचत रकम फिर्ता गरेको छ।
समितिका अनुसार लालीगुराँस सहकारी संस्थाका ३५ जना र तपाइ हाम्रो सहकारी संस्थाका ९० जना बचतकर्ताले पहिलो चरणअन्तर्गत रकम फिर्ता पाएका हुन्।
सरकारले समस्याग्रस्त सहकारी संस्थाबाट असुल गरिएको ऋण तथा व्यवस्थापन गरिएको सम्पत्तिबाट प्राप्त रकमलाई नै बचतकर्ताको रकम फिर्ताका लागि प्रयोग गरिएको जनाएको छ।
समितिका अनुसार प्रारम्भिक चरणमा कम रकम बचत गरेका बचतकर्तालाई प्राथमिकतामा राखेर भुक्तानी गरिएको हो। आगामी चरणमा बचत रकमको आधारमा वर्गीकरण गर्दै अन्य बचतकर्ताको रकमसमेत क्रमशः फिर्ता गर्ने प्रक्रिया अघि बढाइनेछ।
समस्याग्रस्त सहकारी संस्थाबाट ऋण असुली, सम्पत्ति व्यवस्थापन तथा प्राप्त स्रोत परिचालन गरी बचतकर्ताको रकम फिर्ता गर्ने कार्य कानुनी व्यवस्थाअनुसार निरन्तर भइरहेको समितिले जनाएको छ।
