सर्लाही । प्रेमिकालाई घटनास्थलमा बोलाइदिन माग गर्दै एक युवक सर्लाहीको मलंगवास्थित नेपाल टेलिकमको ८० मिटर अग्लो टावरमा चढेका छन्। उनको सुरक्षित उद्धारका लागि नेपाल प्रहरी, नेपाली सेना र सशस्त्र प्रहरी परिचालन गरिएको छ।
गोडैता नगरपालिका–९ बकैनिया निवासी करिब २४ वर्षीय अफसर आलम हुसेन आइतबार बिहान मलंगवा नगरपालिका–९ स्थित नेपाल टेलिकम कार्यालय परिसरमा रहेको टावरमा चढेका हुन्।
टावरको माथि पुगेपछि हुसेनले एक साथीलाई फोन गरेर आफू टावरमा रहेको जानकारी गराएका थिए। त्यसपछि घटनाबारे सुरक्षा निकायलाई खबर गरिएको थियो।
सर्लाही प्रहरीका प्रवक्ता एवं डीएसपी वेदप्रसाद गौतमका अनुसार प्रेम सम्बन्धका कारण मानसिक तनावमा रहेका हुसेनले आफ्नी प्रेमिकालाई घटनास्थलमा बोलाइदिन माग गरेका छन्।
“प्रहरी टोली घटनास्थलमा पुगिसकेको छ। उनलाई सम्झाइ–बुझाइ गरेर सुरक्षित रूपमा उद्धार गर्ने प्रयास भइरहेको छ,” डीएसपी गौतमले बताए।
घटनास्थलमा नेपाली सेना, नेपाल प्रहरी र सशस्त्र प्रहरीको टोली परिचालन गरी युवकलाई सुरक्षित रूपमा तल ल्याउने प्रयास भइरहेको प्रहरीले जनाएको छ।
