काठमाडौं। खाद्य प्रविधि तथा गुण नियन्त्रण विभागले प्रयोगशाला परीक्षणमा गुणस्तर मापदण्ड पूरा नगरेको पाइएपछि वाईवाईसहित चार ब्रान्डका चाउचाउका निश्चित ब्याच तत्काल बजारबाट फिर्ता गर्न निर्देशन दिएको छ।

विभागका अनुसार बजार अनुगमनका क्रममा सङ्कलन गरिएका नमुनाको परीक्षण गर्दा बर्दियाको बाँसगढी–३ स्थित बी.सी.जी. फुड्स इन्टरप्राइजेज प्रालिद्वारा उत्पादित चार प्रकारका इन्स्ट्यान्ट नुडल्स न्यूनस्तरका भेटिएका हुन्।

फिर्ता गर्न निर्देशन दिइएका उत्पादनहरूमा २५ ग्रामको गोलमोल इन्स्ट्यान्ट नुडल्स, ६० ग्रामको वाईवाई इन्स्ट्यान्ट नुडल्स, २५ ग्रामको प्रिमियम पिरो इन्स्ट्यान्ट नुडल्स तथा ६० ग्रामको मामा इन्स्ट्यान्ट नुडल्स रहेका छन्।

विभागले गोलमोल ब्रान्डको ब्याच नम्बर B/BM2 C 2083.01.11 (उत्पादन मिति: २०८३/०१/११), वाईवाई ब्रान्डको ब्याच नम्बर B/BM1-X-2026-05-14 (उत्पादन मिति: २०२६/०५/१४), प्रिमियम पिरो ब्रान्डको ब्याच नम्बर B/BM2 C 2083.01.28 (उत्पादन मिति: २०८३/०१/२८) तथा मामा ब्रान्डको ब्याच नम्बर B/BM1-X-2026-05-13 (उत्पादन मिति: २०२६/०५/१३) भएका उत्पादनहरू बजारबाट तत्काल फिर्ता गर्न आदेश दिएको हो। यी सबै उत्पादनको उपभोग अवधि उत्पादन मितिदेखि १२ महिनासम्म उल्लेख गरिएको छ।

विभागका अनुसार परीक्षणमा ती नमुनाहरू खाद्य स्वच्छता तथा गुणस्तर ऐन, २०८१ को दफा १६(क) विपरीत न्यूनस्तरका पाइएका हुन्।

ऐनको दफा ३८ को उपदफा (२) बमोजिम सम्बन्धित सबै ब्याचका उत्पादन तत्काल बजारबाट फिर्ता गर्न तथा उपदफा (४) अनुसार ती उत्पादनको बिक्री–वितरण नगर्न र नगराउन विभागले सम्बन्धित पक्षलाई निर्देशन दिएको छ।