काठमाडौँ । देशभर निरन्तर वर्षासँगै आएको बाढी र पहिरोका कारण विभिन्न मुख्य राजमार्गहरू अवरुद्ध भएका छन्। नेपाल प्रहरीका अनुसार कोशी, बागमती, गण्डकी र लुम्बिनी प्रदेशका धेरै सडक खण्डमा यातायात सेवा प्रभावित बनेको छ।
कोशी प्रदेशमा मेची राजमार्गअन्तर्गत इलामको राजदुवाली र ताप्लेजुङको खोक्से खोलामा पहिरो तथा वर्षाका कारण सडक पूर्ण रूपमा अवरुद्ध भएको छ। यता भोजपुरस्थित मध्यपहाडी लोकमार्गमा बाढीका कारण सवारी साधन एकतर्फी रूपमा मात्र सञ्चालन भइरहेका छन्।
बागमती प्रदेशमा सम्भावित बाढी र पहिरोको जोखिमलाई ध्यानमा राख्दै केही सडकमा सवारी सञ्चालन रोकिएको छ। काभ्रेको बिपी राजमार्ग र मकवानपुरको कान्ति लोकपथमा सुरक्षाका कारण यातायात बन्द गरिएको छ। साथै, अरनिको राजमार्गअन्तर्गत सिन्धुपाल्चोकको जिरोकिलो र कोदारी क्षेत्रमा पहिरो खस्दा सडक पूर्ण रूपमा अवरुद्ध भएको छ। नुवाकोटको ककनी क्षेत्रमा पनि पहिरोले सडक अवरुद्ध पारेको प्रहरीले जनाएको छ।
गण्डकी प्रदेशमा बागलुङस्थित कालीगण्डकी करिडोर तथा गोरखाको आरुघाट–माछीखोला सडक खण्ड पहिरोका कारण पूर्ण रूपमा बन्द रहेका छन्।
यसैबीच, वर्षा जारी रहेकाले थप बाढी र पहिरोको जोखिम कायम रहेको भन्दै यात्रा गर्नुअघि नजिकको प्रहरी कार्यालय वा सडक विभागबाट सडक अवस्थाबारे जानकारी लिएर मात्र यात्रा गर्न नेपाल प्रहरीले सर्वसाधारणलाई आग्रह गरेको छ।
