काठमाडौं। सामुदायिक विद्यालय व्यवस्थापन समिति महासंघ नेपालले विद्यालयमा आइतबार दिइँदै आएको सार्वजनिक बिदा तत्काल खारेज गरी साताको ६ दिन नियमित पठनपाठन सञ्चालन गर्न सरकारसँग माग गरेको छ।
बुधबार काठमाडौंमा आयोजित पत्रकार सम्मेलनमा महासंघका अध्यक्ष काशीनाथ दंगालले हप्तामा दुई दिन बिदा दिने सरकारी निर्णयका कारण विद्यार्थीहरूको औपचारिक पठनपाठन र सिकाइ अवधि घटेको भन्दै असन्तुष्टि व्यक्त गरे। उनले आइतबारको बिदाले देशभरका अभिभावकमा चिन्ता बढाएको उल्लेख गर्दै बालबालिकाको सिकाइ अवसर सुनिश्चित गर्न साताको ६ दिन विद्यालय सञ्चालन आवश्यक रहेको बताए।
महासंघले संविधानको भावना अनुरूप विद्यालय शिक्षालाई व्यवस्थित बनाउन ‘विद्यालय शिक्षा ऐन’ तत्काल जारी गर्न पनि सरकारसँग आग्रह गरेको छ।
पत्रकार सम्मेलनमा महासंघले नयाँ शिक्षा ऐनको प्रतीक्षामा रहेका बेला शिक्षा नियमावलीमा गरिएको पछिल्लो संशोधनले सामुदायिक विद्यालय व्यवस्थापन समितिको क्षेत्राधिकार संकुचित बनाएको आरोप लगायो।
अध्यक्ष दंगालले शिक्षा नियमावलीको संशोधनले समुदायको भूमिका र अस्तित्वलाई कमजोर बनाएको दाबी गर्दै भने, “पछिल्लो संशोधनले विद्यालय र समुदायबीचको सम्बन्ध कमजोर बनाउने मात्र होइन, नागरिक अधिकारसम्बन्धी राष्ट्रिय तथा अन्तर्राष्ट्रिय कानुन र अभ्यासको समेत उल्लंघन गरेको छ। त्यसैले उक्त संशोधन तत्काल सच्याइनुपर्छ।”
महासंघले विद्यालय व्यवस्थापन समितिमा अभिभावकको नेतृत्व र समुदायको प्रभावकारी प्रतिनिधित्व सुनिश्चित गर्नुपर्ने माग पनि अघि सारेको छ। साथै, व्यवस्थापन समितिलाई विद्यालय तहको सरकारको भूमिकामा स्थापित गर्दै यसको कार्यकाल पाँच वर्ष कायम हुने गरी आवश्यक कानुनी व्यवस्था गर्न सरकारसँग जोडदार आग्रह गरेको छ।
