काठमाडौँ । सन् २०२६ को मे महिनामा नेपालमा विदेशी पर्यटक आगमन उल्लेख्य रूपमा वृद्धि भएको छ । अध्यागमन विभागको तथ्यांक उद्धृत गर्दै नेपाल पर्यटन बोर्डले सार्वजनिक गरेको विवरणअनुसार उक्त महिनामा कुल १ लाख २ हजार ६२६ पर्यटक नेपाल भित्रिएका छन् ।
यो संख्या सन् २०२५ को सोही अवधिको तुलनामा १९।०३ प्रतिशतले बढी हो । अघिल्लो वर्षको मे महिनामा ८६ हजार २१६ पर्यटक नेपाल आएका थिए । साथै, यो आगमन स्तर सन् २०१९ को कोभिडपूर्वको मे महिनाको तथ्यांकभन्दा पनि उच्च रहेको बोर्डले जनाएको छ, जुन वर्ष ७८ हजार ३२९ पर्यटक आएका थिए ।
प्रि-मनसुन सिजनमा पर्ने मे महिनामा पर्वतारोहण तथा पदयात्रा गतिविधि बढ्ने भएकाले पर्यटक आगमनमा वृद्धि देखिने गर्छ । साथै, गर्मी मौसमबाट राहत खोज्दै ठूलो संख्यामा भारतीय पर्यटक नेपाल आउने प्रवृत्ति पनि यस अवधिमा देखिन्छ ।
पर्यटन बोर्डका अनुसार हवाई मार्गमार्फत आउने भारतीय नागरिकलाई मात्र पर्यटकका रूपमा गणना गरिने प्रावधानअनुसार भारतीय पर्यटक आगमनमा उल्लेख्य वृद्धि भएको छ । मे २०२६ मा भारतबाट ४० हजार ७८२ पर्यटक आएका छन्, जुन अघिल्लो वर्ष २८ हजार १६० को तुलनामा ३२।६६ प्रतिशतले बढी हो । यसले समग्र सार्क क्षेत्रको आगमनमा समेत सकारात्मक प्रभाव पारेको छ ।
सार्क मुलुकबाट कुल ४७।२२ प्रतिशत पर्यटक आगमन भएको तथ्यांक छ । बंगलादेशबाट ५ हजार २९८, भुटानबाट १ हजार ३६०, पाकिस्तानबाट ४३४ र श्रीलंकाबाट ५८० पर्यटक नेपाल आएका छन् । सार्क क्षेत्रबाट समग्रमा अघिल्लो वर्षको तुलनामा ३३।४ प्रतिशतले वृद्धि भएको बोर्डले जनाएको छ ।
त्यस्तै, चीनबाट पनि पर्यटक आगमन बढेको छ । मे महिनामा चीनबाट ११ हजार ५१४ पर्यटक आएका छन्, जुन सन् २०२५ को ८ हजार ८२४ को तुलनामा उल्लेख्य वृद्धि हो ।
अन्य एसियाली मुलुकबाट समेत कुल आगमनको १९।९४ प्रतिशत हिस्सा ओगट्ने गरी पर्यटक आएका छन् । यसअन्तर्गत जापानबाट १ हजार ७५६, मलेसियाबाट २ हजार ८५७, फिलिपिन्सबाट ६०४, दक्षिण कोरियाबाट १ हजार २१७, थाइल्याण्डबाट ८२४, इण्डोनेसियाबाट ४२८, सिंगापुरबाट ४४६, भियतनामबाट ४४६ तथा म्यानमारबाट ३३५ पर्यटक नेपाल आएको तथ्यांकमा उल्लेख छ ।
युरोपेली बजारबाट १३।१० प्रतिशत पर्यटक आगमन भएको छ । यस क्षेत्रमा बेलायतबाट ३ हजार ३७५, जर्मनीबाट १ हजार ५४८, रुसबाट १ हजार ५५०, नेदरल्याण्डबाट १ हजार २७८ तथा फ्रान्सबाट १ हजार १५४ पर्यटक नेपाल आएका छन् ।
अस्ट्रेलियाबाट २ हजार ७० पर्यटक भित्रिएका छन् भने अमेरिकी क्षेत्रबाट १०।३५ प्रतिशत हिस्सा रहेको छ । सो क्षेत्रअन्तर्गत संयुक्त राज्य अमेरिकाबाट ९ हजार १ पर्यटक आएका छन् । यद्यपि अघिल्लो वर्षको तुलनामा अमेरिकी पर्यटक संख्यामा सामान्य गिरावट देखिएको तथ्यांकमा उल्लेख छ ।
