तेह्रथुम । विश्व सुर्तीजन्य पदार्थविरुद्धको दिवसका अवसरमा जिल्ला प्रशासन कार्यालयले तेह्रथुम बजारमा अनुगमन गरेको छ ।
प्रमुख जिल्ला अधिकारी वन्दना राई नेतृत्वको अनुगमन टोलीले व्यवसायीहरूसँग अन्तरक्रिया गरी सुर्तीजन्य पदार्थको बिक्री वितरणसम्बन्धी मापदण्ड तथा त्यसले स्वास्थ्यमा पार्ने असरबारे जानकारी गराएको छ ।
म्याङलुङ नगरपालिकाका स्वास्थ्य सहायक इन्द्रप्रसाद पोखरेलले सुर्तीजन्य पदार्थमा सात हजारभन्दा बढी रसायन, करिब २५० हानिकारक र ७० भन्दा बढी क्यान्सरजन्य तत्त्व हुने जानकारी गराएका थिए ।
व्यवसायीहरूलाई अनिवार्य चेतावनीमूलक बोर्ड राख्न, १८ वर्षमुनिका तथा गर्भवतीलाई चुरोट सुर्ती बिक्री नगर्न र शिक्षण तथा स्वास्थ्य संस्थाबाट १०० मिटर भित्र सुर्तीजन्य पदार्थ बिक्री नगर्न निर्देशन दिइएको छ । साथै सार्वजनिक स्थलमा धूमपान निषेध कार्यान्वयन र अन्त:शुल्क भुक्तानीबारे पनि अनुगमन गरिएको थियो ।
संयुक्त अनुगमन टोलीमा उद्योग वाणिज्य संघ, जिल्ला स्वास्थ्य कार्यालय, तीनवटै सुरक्षा निकाय तथा पत्रकार महासंघ पदाधिकारी सहभागी थिए ।
